। चिनियाँ सरकारले अमेरिकी राष्ट्रपति डोनाल्ड ट्रम्पले चीनमाथि लगाएको ३४ प्रतिशत भन्सार करको जवाफमा समान ३४ प्रतिशत नै भन्सार कर लगाउने घोषणा गरेको छ ।
न्युयोर्क टाइम्सका अनुसार चीनको अर्थ मन्त्रालयले शुक्रबार यो निर्णय सार्वजनिक गरेको हो।
योसँगै, चीनले ११ अमेरिकी कम्पनीहरूलाई ‘अविश्वसनीय संस्था’ को सूचीमा राखेको छ। यो निर्णयले ती कम्पनीहरूलाई चीनभित्र व्यापार गर्न र चिनियाँ कम्पनीहरूसँग कारोबार गर्न प्रतिबन्ध लगाउनेछ।
चीनले दुर्लभ खनिज निर्यातमा कडा प्रतिबन्ध लगाउने घोषणा गरेको छ। यी खनिजहरू इलेक्ट्रिक कारदेखि स्मार्ट बमसम्म विभिन्न प्रविधिहरूमा प्रयोग हुने गर्छन् र तिनीहरूको उत्पादन लगभग पूणरुपमा चीनमै सीमित छ।
चिनियाँ भन्सार निकायले केही अमेरिकी कृषि उत्पादकहरूबाट कुखुरा आयात पनि रोक्ने निर्णय गरेको छ।
यी घोषणाहरू चीनका तीन छुट्टाछुट्टै सरकारी निकायहरूले केही मिनेटको अन्तरमै जारी गरेका थिए। यसले ट्रम्पले सुरू गरेको व्यापार युद्धमा चीन कुनै पनि हालतमा पछाडि हट्न तयार छैन भन्ने संकेत गरेको छ ।
क्यानडाले लगायो २५ प्रतिशत भन्सार कर, फ्रान्सले अमेरिकामा लगानी रोक्ने
यस्तै, क्यानडाले बिहीबार अमेरिकी गाडीहरूमा २५ प्रतिशत भन्सार कर लगाउने घोषणा गरेको हो ।
यसैबीच, फ्रान्सले अमेरिकामा सबै लगानी रोक्ने निर्णय गरेको छ। फ्रान्सेली राष्ट्रपति इम्यानुएल म्याक्रोंले ट्रम्पलाई युरोपेली युनियनमाथिको २० प्रतिशत भन्सार कर हटाउन दबाब दिएका छन्।
