— रुसले युक्रेनसँग समुद्री युद्धविराम सुरू गर्नुअघि केही पश्चिमा प्रतिबन्धहरू हटाउनुपर्ने बताएको छ । अमेरिकाले ब्ल्याक सीमा युद्धविरामका लागि रुस र युक्रेन सहमत भएको बताएको केही घण्टा भित्र रूसले आफ्ना देशका बैंकहरूमाथिको प्रतिबन्ध हट्नुपर्ने बताएको हो ।
रुसले सरकारी कृषि बैंक रोसेलखोजमाथिका प्रतिबन्ध खारेज गर्ने र स्विफ्ट अन्तर्राष्ट्रिय भुक्तानी प्रणालीमा फर्महरूको पहुँच पुनर्स्थापित गर्ने लगायतका माग अघि सारेको हो । युक्रेनी अधिकारीहरूले भने रुसले रातभर बन्दरगाह सहर माइकोलेभमा ड्रोन आक्रमण सुरू गरेको जनाएको छ । राष्ट्रपति भ्लोदिमिर जेलेन्स्कीले ती आक्रमण रूसले शान्ति नचाहेको ‘स्पष्ट संकेत’ भएको बताएका छन् ।
रुसले युक्रेनमा आक्रमण सुरू गरेसँगै युरोपेली संघ र यसका सहयोगीले रुसी वित्तीय संस्थाको स्विफ्टमाथिको पहुँच निलम्बन गरिदिएका थिए । सोसाइटी फर वर्ल्डवाइड इन्टरबैंक फाइनान्सियल टेलिकम्युनिकेसन (स्विफ्ट) ले सीमापार पैसाको सहज र द्रुत स्थानान्तरणलाई अनुमति दिन्छ ।
रुसी कम्पनीले स्विफ्टद्वारा प्रदान गरिएको सामान्य सहज र तत्काल लेनदेनमा पहुँच गुमाएपछि बहुमूल्य ऊर्जा र कृषि निर्यातको भुक्तानीमा बाधा पुगेको छ । यो निर्णय उल्टाउन युरोपेली संघको अनुमोदन आवश्यक पर्नेछ । तर पछिल्लो समय युरोपेली देशहरू किभको समर्थनमा देखिएकाले यो तत्काल सम्भव देखिँदैन् ।
