: प्रधानमन्त्री कप पुरुष राष्ट्रिय प्रतियोगितामा विभागीय डर्बी बीचको खेलमा त्रिभुवन आर्मीले नेपाल पुलिसको अपराजित यात्रामा पूर्णविराम लगाएको छ।
भैरहवास्थित एक्स्ट्राटेक ओभलमा भएको खेलमा आर्मीले पुलिसलाई ४ विकेटले हराएको हो। फाइनलअघि यी दुई विभागीय डर्बीको खेलमा आर्मीले जित निकालेको हो। फाइनल खेलमा पनि यी दुई टिमले उपाधिका लागि खेल्नेछन्।
टस हारेर ब्याटिङ गरेको पुलिसले १४८ रन बनाएको थियो। पुलिसले दिएको १४९ रनको विजयी लक्ष्य पछ्याएको त्रिभुवन आर्मीले ४१ ओभरमा ६ विकेट गुमाउँदै लक्ष्य पूरा गरेको हो। आर्मीका लागि विवेक यादवले सर्वाधिक ४१ रनको अविजित पारी खेले। उनले ४५ बलमा ५ चौका र १ छक्का प्रहार गरे।
ओपनरद्वय तृतराज दास र सन्तोष कार्कीले क्रमशः २५ र २२ रन बनाए। भिम सार्कीले २३, वसिर अहमदले १२ रन बनाए। कप्तान विनोद भण्डारी १३ रनमा अविजित रहे।
पुलिसका लागि बलिङतर्फ ललित राजवंशीले सर्वाधिक ४ विकेट लिए। उनले १० ओभरमा २ मेडनसहित ३४ रन खर्चिए। दिपेन्द्र सिंह ऐरी र करण केसीले समान १–१ विकेट लिए।
nullत्यसअघि पहिलो इनिङ्समा ब्याटिङ गरेको पुलिस ४१.४ ओभरमा अलआउट हुँदै १४८ रन बनाएको थियो। पुलिसका लागि कप्तान दिपेन्द्र सिंह ऐरीले सर्वाधिक ५० रनको अर्धशतीयक पारी खेले। उनले ३७ बलमा ३ चौका र २ छक्का प्रहार गरेका हुन्। ओपनरद्वय कुशल भुर्तेल र अमित श्रेष्ठले दोहोरो अंक नबनाई पेभेलियन फर्किएका थिए। अर्जुन साउदले १३, गुल्सन झाले १७ रन बनाउँदा सागर ढकाल १६ रनमा अविजित रहे। अन्य कुनै पनि ब्याटरले दोहोरो अंकमा रन बनाउन सकेनन्।
आर्मीका लागि साहब आलमले सर्वाधिक ४ विकेट लिए। उनले १० ओभरमा ३ मेडनसहित ३१ रन खर्चिए। नरेन साउदले ३ विकेट लिँदा कुशल मल्ल र भिम सार्कीले १–१ विकेट लिए।
फाइनल खेल शनिबार हुनेछ।
