— अमेरिकी राष्ट्रिय सुरक्षा सल्लाहकार माइक वाल्ट्जले सैन्य आक्रमणबारे गोप्य सूचना चुहावटमा जिम्मेवारी लिएका छन् । उनले यमनमा सैन्य आक्रमणको योजनाबारे छलफल गरिएको ‘च्याट ग्रुप’ मा एक पत्रकारलाई जोडेकोमा आफू जिम्मेवार रहेको स्वीकार गरेका हुन् ।
सामाजिक सञ्जाल सिग्नलमा बनाइएको उक्त ‘च्याट ग्रुप’ मा अमेरिकी उपराष्ट्रपति जेडी भेन्ससहितका उच्च पदस्थ अधिकारीहरू थिए । च्याट ग्रुपमा एट्लान्टिक पत्रिकाका प्रमुख सम्पादक जेफ्री गोल्डबर्गलाई पनि जोडिएको थियो ।
गोल्डबर्गले गल्तिले माइक वाल्ट्ज नामक प्रयोगकर्ताले सिग्नल च्याटमा आफूलाई पनि थपेको बताएका थिए । ‘म पूर्ण जिम्मेवारी लिन्छु । मैले समूह बनाएको थिएँ,’ वाल्ट्जले मंगलबार फक्स न्युजसँग भने, ‘यो लज्जास्पद हो ।’
अमेरिकी राष्ट्रपति डोनाल्ड ट्रम्प र गुप्तचर प्रमुखहरूले च्याट ग्रुपमा सार्वजनिक सूचनाले सुरक्षा जोखिम नभएको र कुनै पनि वर्गीकृत सामग्री साझा नगरिएको बताएका छन् । तर विपक्षी दल डेमोक्रेटिकका साथै केही रिपब्लिकन दलका नेता तथा सांसदले यो विषय गम्भीर रहेको भन्दै अनुसन्धानका लागि आह्वान गरेका छन् ।
Sunrise bank
यसअघि गोल्डबर्गले एक लेख लेख्दै यमनमा हवाई आक्रमण हुनुभन्दा दुई घण्टा अघिसम्म हातहतियार, बम आक्रमण तथा लक्ष्यसम्बन्धी गोप्य योजनामा आफूले पहुँच पाएको बताएका थिए । तर उनले उक्त सूचना भने लेखमा खुलाएका थिएनन् ।
वाल्ट्जले फक्स न्यूजसँगको अन्तर्वार्तामा गोल्डबर्ग कसरी च्याटमा आए भनेर व्याख्या गर्न सकेनन् । तर उनले आफु मातहतका कुनै कर्मचारी जिम्मेवार नभएको बताए । उक्त ग्रुप च्याटमा अर्को एक अधिकारी हुनुपर्नेमा गोल्डबर्ग जोडिन पुगेको उनको दाबी छ ।
‘हामीसँग यो कसरी भयो भनेर हेर्ने उत्कृष्ट प्राविधिक छन्,’ वाल्ट्जले भनेका छन् । आफ्नो फोनमा गोल्डबर्गको नम्बर नभएको उनको दाबी छ । ‘म तपाईंलाई शत प्रतिशत भन्न सक्छु म यो मान्छेलाई चिन्दिन,’ वाल्ट्जले भने । वाल्ट्जले कसरी त्यस्तो भयो भनेर पत्ता लगाउन मद्दतका लागि इलन मस्कसँग पनि कुरा गरेको बताएका छन् ।
