: प्रधानमन्त्री कप पुरुष राष्ट्रिय क्रिकेट प्रतियोगिताको लिग चरणको अन्तिम खेलमा मधेश प्रदेशले बागमती प्रदेशलाई ४ विकेटले हराएको छ।
मधेशका कप्तान अनिल कुमार शाहको अलराउन्ड प्रदर्शनमा मधेशले अन्तिम खेलमा जित निकाल्दै प्रतियोगिता सकेको हो। उनले बलिङतर्फ २ विकेट र ब्याटिङमा ७० रन बनाए। मधेशसँग पराजित भए पनि बागमती भने शीर्ष ४ मा रहँदै जय ट्रफी खेल्ने भएको छ। समान ८ अंक भए पनि नेट रनरेटमा अगाडि रहँदै बागमती शीर्ष चारमा अटाएको हो।
सिद्धार्थनगरस्थित सिद्धार्थ क्रिकेट रंगशालामा लिगको अन्तिम खेलमा बागमती प्रदेशले २५९ रन बनाएको थियो। बागमतीले दिएको २६० रनको लक्ष्य पछ्याएको मधेशले ४६.१ ओभरमा ६ विकेट गुमाउँदै २६३ रन बनाएको थियो। मधेशको जितमा कप्तान अनिल कुमार शाहले ७० रनको अविजित पारी खेले। उनले ५३ बलमा ७ चौका र २ छक्का प्रहार गरेका हुन्।
मधेशका ओपनरद्वय रोहन विक र शैलेन्द्र शाहले क्रमशः ३९ र १६ रन बनाए। हरिशंकर शाहले ३३, पवन सरार्फले ३१, विशाल पटेलले १३ र दिपेश दासले १९ रन बनाए। रुपेश सिंह २५ रनमा अविजित रहे।
बागमतीका लागि बलिङ तर्फ सूर्य तामाङले सर्वाधिक २ विकेट लिए। उनले १० ओभरमा २ मेडनसहित ४४ रन खर्चिए। रिजन ढकाल, गौतम केसी, विपिन आचार्य र इशान पाण्डेले समान १–१ विकेट लिए।
पहिलो इनिङ्समा ब्याटिङ गरेको बागमती प्रदेशले निर्धारित ५० ओभरमा ८ विकेट गुमाउँदै २५९ रन बनाएको थियो। बागमतीका ओपनर ब्याटर इशान पाण्डेले शतकीय पारी खेले। उनले १२७ बलमा १४ चौकासहित ११४ रन बनाएका हुन्।
शुभ कंसाकारले २०, रिजन ढकालले ३० र विवेक मगरले ३० रन र विपिन आचार्यले २७ रन बनाए। विपिन आचार्य १७ रनमा अविजित रहे। मधेशका लागि हरिशंकर शाह, पवन सर्राफ र अनिल शाहले समान २–२ विकेट लिए। रुपेश सिंह र विशाल पटेलले १–१ विकेट लिए।
