। अन्तर्राष्ट्रिय क्रिकेट परिषद् (आईसीसी)ले आईसीसी इलीट प्यानल अफ अम्पायर्सका लागि नयाँ नामहरू घोषणा गरेको छ। दक्षिण अफ्रिकाका अल्लाउद्दिन पालेकर र इंग्ल्यान्डका एलेक्स व्हार्फ प्यानलमा समावेश भएका छन् भने माइकल गफ र जोएल विल्सन बाहिरिएका छन्।
पालेकर पूर्व प्रथम श्रेणी क्रिकेटर हुन् र उनले ४ टेस्ट, २३ एकदिवसीय (ODI) र ६७ टी-२० अन्तर्राष्ट्रिय खेलमा अम्पायरिङ गरिसकेका छन्। उनले २०२४ पुरुष टी-२० विश्वकप र यू-१९ क्रिकेट विश्वकपमा पनि अम्पायरिङ गरेका थिए।
त्यस्तै, एलेक्स व्हार्फले १६ वर्षको प्रथम श्रेणी क्रिकेट करियर बिताएका छन्। उनले इंग्ल्यान्डका लागि १३ एकदिवसीय खेलेका थिए। अम्पायरको रूपमा उनले ७ टेस्ट, ३३ एकदिवसीय, र ४५ टी-२० अन्तर्राष्ट्रिय खेलहरू खेलाइसकेका छन्।
आईसीसीका अध्यक्ष जय शाहले पालेकर र व्हार्फलाई बधाई तथा गफ र विल्सनलाई उनीहरूको योगदानका लागि धन्यवाद दिएका छन्। ‘आईसीसी इलीट प्यानलमा रहनु भनेको उच्च स्तरको दबाब झेल्नु हो। तर हामीलाई विश्वास छ कि अल्लाउद्दिन र एलेक्ससँग अनुभव, धैर्य र सीप छ’ शाहले भने।
पालेकरले आफूलाई इलीट प्यानलमा समावेश गरिएकामा खुसी व्यक्त गर्दै आफ्नो परिवार, साथीभाइ र प्रशिक्षकहरूप्रति आभार व्यक्त गरे। उनले आफ्नो पिता जमालोदीनलाई प्रेरणाको स्रोत बताउँदै पत्नी शकीराको समर्थनको लागि धन्यवाद दिए।
त्यसैगरी, एलेक्स व्हार्फले आईसीसी र इंग्ल्यान्ड क्रिकेट बोर्ड (ECB) प्रति कृतज्ञता व्यक्त गर्दै आफ्नो सहकर्मीहरूसँग अझ धेरै सिक्ने उत्साह व्यक्त गरे।
आईसीसी इलीट अम्पायर प्यानल (२०२५-२६) मा कुमार धर्मसेना (श्रीलंका), क्रिस्टोफर गाफाने (न्यूजिल्यान्ड), एड्रियन होल्डस्टक (दक्षिण अफ्रिका), रिचार्ड इल्लिंगवर्थ (इंग्ल्यान्ड), रिचार्ड केटलबरो (इंग्ल्यान्ड), नितिन मेनन (भारत), अल्लाउद्दिन पालेकर (दक्षिण अफ्रिका), अहसान रजा (पाकिस्तान), पल रिफेल (अस्ट्रेलिया), शरफुद्दौला इब्ने शाहिद (बंगलादेश), रोड्नी टकर (अस्ट्रेलिया) र एलेक्स व्हार्फ (इंग्ल्यान्ड) रहेका छन्।
नयाँ अम्पायरहरूको समावेशसँगै आईसीसीको इलीट प्यानल अझ मजबुत भएको छ र आगामी ठूला प्रतियोगितामा उच्चस्तरीय अम्पायरिङ सुनिश्चित गर्ने आईसीसीले विश्वास व्यक्त गरेको छ ।
-आईसीसीबाट
