— रुसी सेनाले शनिबार राति युक्रेनी राजधानी किभमा गरेका आक्रमणमा तीन जनाको मृत्यु भएको छ । युक्रेनी राष्ट्रपति भ्लोदिमिर जेलेन्स्कीका अनुसार मृतकहरूमा पाँच वर्षीया छोरी र उनका बुबा छन् ।
रुसी आक्रमणसँगै किभस्थित एक अपार्टमेन्टमा आगो फैलिएको र ‘सबैजना चिच्याउन र भाग्न थाले’का प्रत्यक्षदर्शीलाई उद्धृत गर्दै बीबीसीले जनाएको छ । युक्रेनी वायुसेनाले गए राति प्रहार गरिएका १ सय ४७ मध्ये ९७ ड्रोन खसालेको जनाएको छ ।
त्यस्तै, रुसी रक्षा मन्त्रालयले पनि युक्रेनबाट प्रहार भएका पाँच दर्जन युक्रेनी ड्रोन खसालेको दाबी गरेको छ । रुसी अधिकारीका अनुसार आक्रमणपछि एउटा कारमा आगलागी भएपछि एक जनाको ज्यान गएको छ ।
आफ्नो देशको राजधानीमा आक्रमण भएपछि जेलेन्स्कीले रुसमाथि नयाँ दबाब दिन आह्वान गरेका छन् । ‘यी आक्रमण र यो युद्ध अन्त्य गर्न मस्कोमाथि नयाँ निर्णय र नयाँ दबाब आवश्यक छ,’ जेलेन्स्कीले भनेका छन्, ‘यी आक्रमण दैनिक वास्तविकता हुन् ।’ रुसविरुद्ध ‘अझै प्रभावकारी’ प्रतिबन्ध लगाउनुपर्ने जेलेन्स्कीको भनाइ छ ।
अमेरिका र युक्रेनका प्रतिनिधिमण्डलले आइतबार साउदी अरबमा भेटवार्ता गर्दैछन् । अमेरिकी राष्ट्रपति डोनाल्ड ट्रम्पका विशेषदूत स्टिभ विटकफले अमेरिकाले साउदी अरबमा हुने अर्को चरणको शान्ति वार्तामा ‘वास्तविक प्रगति’ हुने अपेक्षा गरेको बताएका छन् ।
‘हाम्रो काम मुद्दारूलाई साँघुरो पार्नु हो । दुवै पक्षलाई एकै ठाउँमा ल्याउनु र हत्या रोक्नु हो,’ उनले भनेका छन् । रुसी राष्ट्रपति भ्लादिमिर पुटिनले ‘शान्ति चाहेको’ उनको भनाइ छ । गत साता ट्रम्प र उनका रूसी समकक्षीबीच भएको वार्तामा धेरै प्रगति भइसकेको विटकफको भनाइ छ ।
रूसी राष्ट्रपति पुटिनका प्रवक्ता दिमित्री पेस्कोभले यसै साता रुसी राष्ट्रपति र उनका अमेरिकी समकक्षी डोनाल्ड ट्रम्पबीच भएको फोन वार्तालाई ‘रचनात्मक र धेरै सम्मानजनक’ भनेका छन् । पेस्कोभले रुसी राज्य सञ्चालित सञ्चारमाध्यमसँग उनले उक्त फोनवार्ताले दुई नेताबीच आमनेसामने भेटघाट हुने सम्भावना थप बढाएको बताएका हुन् ।
‘यस्तो बैठकका लागि पर्याप्त रूपमा तयार हुनुपर्छ । पहिले, कठिन प्राविधिक वार्ताहरू हुनुपर्छ । सोमबार मात्र हाम्रा वार्ताकारले यो जटिल प्रक्रिया सुरू गर्न रियाद जानेछन्,’ पेस्कोभ थप्छन् । यसअघि ट्रम्पले पनि पुटिनसँगको फोन वार्ता ‘धेरै राम्रो र उत्पादक’ भएको बताएका थिए ।
यसअघि रुसी राष्ट्रपति भ्लादिमिर पुटिनले युद्धविरामका लागि अमेरिकाले र युक्रेनले अघि सारेको संयुक्त प्रस्ताव अस्वीकार गरिदिएका थिए । ३० दिनका लागि युद्ध रोक्न अस्वीकार गरेका पुटिनले उक्त अवधिसम्म ऊर्जा पूर्वाधारमा आक्रमण रोक्न सहमत भएका थिए ।
