: प्रधानमन्त्री कप पुरुष राष्ट्रिय प्रतियोगितामा त्रिभुवन आर्मी क्लबले लुम्बिनी प्रदेशमाथि १३१ रनको फराकिलो जित निकालेको छ। प्रतियोगितामा सातौं जित निकालेको आर्मीले फाइनल खेल्ने सम्भावना बलियो बनाएको छ।
सिद्धार्थनगरस्थित सिद्धार्थ रंगशालामा टस जितेर ब्याटिङ गरेको आर्मीले २४३ रन बनाएको थियो। आर्मीले दिएको २४४ रनको लक्ष्य पछ्याएको लुम्बिनी २७.१ ओभरमा ११२ रन बनाउँदै अलआउट भएको हो। लुम्बिनीका लागि कप्तान देव खनालले सर्वाधिक ३७ रन बनाए। ओपनिङमा आएका देवले ४६ बलमा ४ चौका र १ छक्का प्रहार गरे।
अर्का ओपनर मिर्नाल गुरुङ भने १ रनमै सोमपाल कामीको बलमा एलबीडब्ल्यू आउट भए। मनिष थापा र विप्रसन केसीले समान १३–१३ रन बनाए। निर्मल गुरुङले १० रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्। आर्मीका लागि बलिङमा साहब आलमले सर्वाधिक ४ विकेट लिए। उनले ९.१ ओभरमा २ मेडनसहित २५ रन खर्चिए। नरेन साउदले २ विकेट लिँदा सोमपाल कामी, आकाश चन्द र वसिर अहमदले समान १–१ विकेट लिए।
त्यसअघि ब्याटिङ गरेको आर्मी ४९.२ ओभरमा २४३ रन बनाउँदै अलआउट भएको थियो। आर्मीका लागि वसिर अहमदले सर्वाधिक ८६ रनको अर्धशतकीय पारी खेले। उनले १०४ बलमा ६ चौका प्रहार गरेका हुन्। आर्मीका ओपनर ब्याटर तृतराज दासले ३१ रन बनाउँदा अर्का ओपनर सन्तोष कार्की १ रन बनाउँदै निर्मल गुरुङको बलमा क्लिन बोल्ड भए।
इम्रान शेखले १२, भिम सार्कीले ४४, सोमपाल कामीले २८, कुशल मल्लले १७ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्। लुम्बिनीका लागि बलिङमा अजय चौहानले सर्वाधिक ४ विकेट लिए। कृष्ण कार्की, निर्मल गुरुङ, रमेश कुर्मी, विप्रसन केसी, नर सार्की र देव खनालले समान १–१ विकेट लिए। आर्मीले हालसम्म १ मात्र हार बेहोरेको छ। लुम्बिनीले ८ खेलमा ४ जित र ४ हार बेहोरेको छ।
