— इजरायलले गाजामा गरेको हवाई आक्रमणमा हमासका राजनीतिक नेता सलाह अल-बर्दवील मारिएका छन् । बर्दवील गाजाको दक्षिणी सहर खान युनिसमा इजरायली रक्षा बल (आईडीएफ) ले गरेको आक्रमणमा मारिएका हमासका एक अधिकारीलाई उद्धृत गर्दै बीबीसीले जनाएको छ ।
स्थानीयका अनुसार आक्रमणमा बर्दवील र उनकी श्रीमती दुवैको मृत्यु भएको हो । यसबारे इजरायली अधिकारीहरूले भने कुनै टिप्पणी गरेका छैनन् ।
इजरायली सेनाले गत मंगलवारदेखि गाजामा पुन: हमला सुरू गरेको छ । यसअघि दुई पक्षबीच भएको युद्धविराम १९ जनवरीदेखि लागू भएको थियो । तर उक्त सम्झौताप्रति हमास प्रतिबद्ध नभएको आरोप लगाउँदै इजरायलले पुन: आक्रमण सुरू गरेको हो ।
हमासले इजरायली आरोप अस्वीकार गर्दे कतार, इजिप्ट तथा अमेरिकाको मध्यस्थतामा भएको युद्धविरामा उल्लंघन गरेको आरोप लगाएको छ । हमासद्वारा सञ्चालित स्वास्थ्य मन्त्रालयका अनुसार गाजामा आईडीएफले गरेको आक्रमणमा पछिल्लो २४ घण्टामा ३२ जनाको ज्यान गएको छ ।
हमासले दक्षिणी इजरायलमा ७ अक्टोबर २०२३ मा भीषण आक्रमण गरेको थियो । उक्त आक्रमणमा करिब १२ सय जना मारिएका थिए भने २ सय ५१ जनालाई हमासले बन्धक बनाएर लगेको थियो ।
घटनापछि इजरायलले गाजामा गरेको जवाफी आक्रमणमा ४९ हजार ५ सय भन्दा बढी प्यालेस्टिनी मारिएका छन् ।
