: मधेश प्रदेशले विभागीय टिम त्रिभुवन आर्मीलाई ३ विकेटले हराएको छ। प्रधानमन्त्री कप पुरुष राष्ट्रिय प्रतियोगितामा आर्मीको यो पहिलो हार हो। मधेशको भने दोस्रो जित हो।
लमहीस्थित देउखुरी अन्तर्राष्ट्रिय क्रिकेट मैदानमा टस जितेर ब्याटिङ गरेको आर्मीले दिएको २१८ रनको लक्ष्य पछ्याएको मधेशले ४८ ओभरमा ७ विकेट गुमाउँदै लक्ष्य पूरा गरेको हो।
मधेश प्रदेशका लागि कप्तान अनिल शाहले सर्वाधिक ४५ रन बनाए। उनले ४८ बलमा ७ चौका प्रहार गरेका हुन्। ओपनरद्वय मयन यादव र शैलेन्द्र शाहले क्रमशः १० र १५ रन बनाए। हरिशंकर शाह र पवन सर्राफले समान ३७–३७ रनको पारी खेले। दिपेश दासले १० रन बनाए। निखिल सिंह १४ र रुपेश सिंह ३८ रनमा अविजित रहे।
आर्मीका लागि नरेन साउदले सर्वाधिक ३ विकेट लिए। उनले १० ओभरमा ५४ रन खर्चिए। वसिर अहमद र सोमपाल कामीले समान २–२ विकेट लिए। त्यसअघि ब्याटिङ गरेको आर्मीले निर्धारित ५० ओभरमा ७ विकेट गुमाउँदै २१७ रन बनाएको थियो।
त्रिभुवन आर्मीका लागि भिम सार्कीले सर्वाधिक ८९ रन बनाए। उनले १२६ बल खेल्दै ४ चौका प्रहार गरेका हुन्। ओपनरद्वय तिर्थराज दास र सन्तोष कार्कीले क्रमशः १४ र ३३ रन बनाए। कप्तान विनोद भण्डारी ११ रनमा कमल गुप्ताको बलमा एलबीडब्ल्यु भए।
वसिरले १०, विवेक यादवले १६ रन बनाउँदा कुशल मल्ल २४ रनमा अविजित रहे। मधेशका लागि रुपेश सिंह, कमल गुप्ता र पवन सरार्फले समान २–२ विकेट लिए। रञ्जित कुमारले १ विकेट लिए।
आर्मीले ६ खेलमा ५ जित निकालेको आर्मीको अपराजित यात्रामा मधेशले ब्रेक लगाएको हो। मधेशले भने फाइनल खेल्ने सम्भावना सकिए पनि प्रतियोगितामा दोस्रो जित निकाल्दै अंक तालिकामा सुधार गरेको छ। मधेशले ५ खेलमा २ जित र ३ हार बेहोर्दै ४ अंक जोडेको छ।
