: सुदूरपश्चिम प्रदेशले लुम्बिनी प्रदेशलाई ५ विकेटले पराजित गर्दै प्रतियोगितामा दोस्रो जित दर्ता गरेको छ।
प्रधानमन्त्री कप पुरुष राष्ट्रिय प्रतियोगितामा एक्स्ट्राटेक ओभलमा टस जितेर ब्याटिङ गरेको लुम्बिनी प्रदेशले दिएको ११७ रनको लक्ष्य पछ्याएको सुदूरपश्चिम प्रदेशले ३१.१ ओभरमा लक्ष्य पूरा गरेको हो।
सुदूरपश्चिम प्रदेशका लागि किरण ठगुन्नाले सर्वाधिक ४३ रनको अविजित पारी खेले। उनले ४३ बलमा ४ चौका र २ छक्का प्रहार गरे। ओपनर टेक रावत सस्तैमा आउट हुँदा अर्का ओपनर खडक बोहोराले ११ रन बनाए। प्रकाश पाण्डेले २२ रन बनाउँदै पेभेलियन फर्किए। कप्तान नारायण जोशले २५ रनको अविजित पारी खेले।
लुम्बिनीका लागि बलिङतर्फ रमेश कुर्मीले सर्वाधिक २ विकेट लिए। निर्मल गुरुङ, अजय चौहान र विप्रसन केसीले समान १–१ विकेट लिए। त्यसअघि ब्याटिङ गरेको लुम्बिनी ४४.१ ओभरमा ११६ रन बनाउँदै अलआउट भएको थियो।
लुम्बिनीका लागि कप्तान देव खनालले सर्वाधिक ४१ रन बनाए। शीर्ष क्रममा तीन ब्याटर सस्तैमा समेटिँदा देवले सम्हालिएको पारी खेलेका हुन्। उनले ७१ बलमा ४ चौका प्रहार गरे।
प्रज्वल थापाले ३० रन बनाउँदा अन्य कुनै पनि ब्याटरको ब्याटरले दोहोरो अंकको रन जोड्न सकेन। सुदूरपश्चिम प्रदेशका लागि हेमन्त धामीले सर्वाधिक ४ विकेट लिए। उनले ९ ओभरमा १ मेडनसहित २६ रन खर्चिए। सूर्य श्रेष्ठ, शेर मल्ल र मिलन बोहोराले समान २–२ विकेट लिए।
लुम्बिनी ६ खेलमा ४ जित र १२ हारसहित ८ अंक बटुलेको छ। आजको खेल जितेको भए लुम्बिनीको पनि फाइनल खेल्ने सम्भावना रहन्थ्यो। आजको हारले लुम्बिनीको शीर्ष २ मा पुग्ने लक्ष्यमा बाधा पुगेको छ।
