— इजरायली सेनाले गाजा क्षेत्रमा गरेको आक्रमणमा बुधबार १३ जनाको ज्यान गएको छ । इजरायली प्रधानमन्त्री बेन्जामिन नेतान्याहुले प्यालेस्टिनी क्षेत्रमा लडाइँ पुनः सुरू गर्ने बताएलगत्तै इजरायली रक्षा बल (आईडीएफ)ले थप आक्रमण गरेको हो ।
प्यालेस्टिनी वाफा समाचार एजेन्सीका अनुसार अल-मावासी आवासीय क्षेत्रनजिकैको अस्थाई शिविरमा गरिएको ड्रोन आक्रमणमा दुई जनाको ज्यान गएको हो । घटनामा पाँच जना घाइते भएका छन् ।
आईडीएफले भने हमासको सैन्य स्थलमा आक्रमण गरेको बताएको छ । उक्त स्थलबाट हमासले इजरायलमा गोली चलाउने तयारी गरिरहेको आईडीएफको दाबी छ । हमासद्वारा नियन्त्रित डुंगाहरूलाई पनि प्रहार गरिएको आईडीएफले जनाएको छ ।
यसअघि इजरायली प्रधानमन्त्री नेतान्याहूले हमासविरुद्ध ‘पूर्ण शक्तिका साथ लडाईं गर्ने’ बताएका थिए । दुई दिनयता गरिएका आक्रमण ‘सुरुवात मात्र’ भएको उनको दाबी छ । हमासद्वारा सञ्चालित स्वास्थ्य मन्त्रालयले मंगलबार राति गरिएको आक्रमणको स्तर त्यति ठूलो नभएको जनाएको छ ।
यसअघि इजरायलले सोमबार राति र मंगलबार बिहान गरेका आक्रमणमा ४ सय १३ जनाको ज्यान गएको थियो । उक्त आक्रमण १९ जनवरीमा दुई पक्षबीचको युद्धविराम सम्झौता लागू भएयताकै भीषण हो ।
उक्त सम्झौतामा युद्धविराम तीन चरणमा लागू हुने उल्लेख छ । युद्धविरामको पहिलो चरणमा नै दोस्रो चरणबारे वार्ता हुने भनिएको थियो । तर उक्त वार्ता हुन नसक्दा पुन: युद्ध चर्केको छ ।
प्रस्तावित दोस्रो चरणमा इजरायलले गाजाबाट सेना फिर्ता गर्ने उल्लेख छ । तर इजरायल र अमेरिकाले पहिलो चरणको अवधि बढाउन जोड दिएका थिए । उक्त अवधिमा थप प्यालेस्टिनी कैदीहरूको बदलामा बाँकी बन्धक रिहा गर्ने उनीहरूको प्रस्ताव थियो ।
