: सिंगापुरसँग मैत्रीपूर्ण खेल र एसियन कप छनोट खेल्न जान लागेका नेपाली राष्ट्रिय फुटबल टिमलाई बिदाइ गरिएको छ ।
मंगलबार काठमाडौंमा राखेप सदस्यसचिव टंकलाल घिसिङ र एन्फा पदाधिकारिहरूले नेपाली राष्ट्रिय फुटबल टिमलाई बिदाइ गरेका हुन् ।
नेपालले यही चैत ८ गते सिंगापुरसँग मैत्रीपूर्ण खेल खेल्नेछ भने एसियन कप छनोटमा चैत १२ गते मलेसियासँग उसकै घरेलु मैदानमा खेल्ने तालिका छ ।
बिदाइ कार्यक्रममा नेपाली राष्ट्रिय फुटबल टिमका कप्तान किरण चेम्जोङले नयाँ प्रशिक्षक र नयाँ खेलाडीका साथै छोटो समयको प्रशिक्षणपछि पनि खेलका लागि उत्साहित भएको बताए ।
नयाँ कोच भए पनि त्यसलाई सबैले सहज रूपमा लिएर प्रशिक्षणमा सहभागी भएको उनले बताए । उनले अबको खेलमा नेपाली टोलीले राम्रो प्रदर्शन गर्ने र साफको राम्रो तयार हुनेसमेत उल्लेख गरे ।
त्यस्तै नेपाली राष्ट्रिय फुटबल टिमका मुख्य प्रशिक्षक म्याट रसले खेलाडीको प्रशिक्षण र व्यवहार निकै राम्रो भएकाले उत्कृष्ट टिम निर्माण भएको बताए ।
२३ सदस्यीय टोली बनाउँदा केही खेलाडी छुटे पनि मैत्रीपूर्ण खेल र एसियन कप छनोट खेलमा राम्रो नजिता आउनेमा आफू सकारात्मक रहेको उनको भनाइ छ ।
उनले जारी गरेको टिममा गोलकिपर अञ्जल श्रेष्ठ, डिफेन्डर रक्षक सुमन श्रेष्ठ र फर्वाड सुवास बम ठकुरीले पहिलो पटक राष्ट्रिय टोलीमा स्थान बनाएका हुन् ।
फर्वाड रेजिन सुब्बा र मिडफिल्डर कृतिशरत्न छुन्जु राष्ट्रिय टोलीमा फर्किएका छन्।
