: प्रधानमन्त्री कप पुरुष राष्ट्रिय प्रतियोगितामा कर्णाली प्रदेशले कोशी प्रदेशलाई १२७ रनले पराजित गरेको छ। भैरहवास्थित एक्स्ट्राटेक ओभलमा टस जितेको कर्णालीले दिएको २१९ रनको लक्ष्य पछ्याएको कोशी ३५ ओभरमा ९१ रन बनाउँदै अलआउट भएको हो।
कोशीका लागि शीर्ष क्रममा ३ ब्याटरबाहेक अरू कसैले पनि दोहोरो अंकमा रन बनाएनन्। कोशीका लागि ओपनर चिराग शाहले सर्वाधिक २५ रन बनाए। उनले ५२ बल खेल्दै ४ चौका प्रहार गरेका हुन्। अर्का ओपनर सकिब हकले १३ र कप्तान अंकित सुवेदीले १० रन बनाए। अन्य कुनै पनि ब्याटरले दोहोरो अंकमा रन बनाउन सकेनन्।
कर्णालीका लागि दिपेन्द्र रावत र सुनिल धमलाले समान ३–३ विकेट लिए। कप्तान दिवान पुनले २ र अनुज चनाराले १ विकेट लिए। त्यसअघि ब्याटिङ गरेको कर्णालीले निर्धारित ५० ओभरमा ९ विकेट गुमाउँदै २१८ रन बनाएको थियो।
कर्णालीका लागि अर्जुन घर्तीले सर्वाधिक ८८ रनको अविजित पारी खेले। उनले ९५ बलमा ११ चौका र २ छक्का प्रहार गरेका हुन्। ओपनरद्वय सुनिल धमलाले र विपिन रावलले क्रमशः १३ र १० रन बनाए। निश्चल रावलले २० रन, हिमान्शु शाहीले ४६ रन बनाउँदै क्याच भए। प्रकाश जैशीले १८ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्।
कोशीका लागि विपिन महतोले सर्वाधिक ३ विकेट लिए। दिपेश कँडेल र प्रकाश कार्कीले २–२ विकेट लिँदा श्रवण किस्कु र सुजन थपलियाले १–१ विकेट लिए। यो जितसँगै कर्णालीले अंक तालिकामा छलाङ मारेको छ। ५ खेलमा २ जित र ३ हार बेहोरेको कर्णाली ४ अंकसहित पाँचौं स्थानमा उक्लियो। कोशी भने ६ खेलमा १ मात्र जितसहित तालिकाको पुछारमा रहेको छ।
