। अष्ट्रेलियाली पूर्वक्रिकेटर तथा चर्चित ब्याट्सम्यान डेभिड वार्नर फिल्म क्षेत्रमा देखिने भएका छन् । वार्नरले भारतको तेलुगु फिल्म निर्देशक भेन्की कुदुमुलाको आगामी एक्सन ड्रामा ‘रोबिन हुड’बाट डेब्यु गर्दैछन् ।
वार्नरले सोसल मिडिया प्लाटफर्म एक्समा पोस्ट सेयर गर्दै यसबारे जानकारी दिएका हुन् । जसमा उनले फिल्ममा काम गर्न निकै उत्साहित रहेको बताएका छन् ।
यो फिल्मलाई मैत्री मूभि मकेर्सले निर्माण गर्नेछ । निर्माण कम्पनीले शनिबार वार्नरलाई भारतीय सिनेमामा औपचारिक रूपमा स्वागत गरेको छ ।
प्रोडक्सन हाउसले पोस्टर सेयर गर्दै लेखेको छ, ‘क्रिकेट मैदानमा चम्किएर आफ्नो छाप छोडेपछि अब डेभिड वार्नरको सिल्भर स्क्रिनमा आउने समय आएको छ । हामी डेभिड वार्नरलाई रोमाञ्चक क्यामियोमा प्रस्तुत गर्दैछौं ।’
‘रोबिन हुड’ आगामी मार्च २८ मा हलमा रिलिज हुनेछ । फिल्मको बारेमा डेभिड वार्नरले भने, ‘यो फिल्मको सुटिङ निकै रमाइलो थियो । म भारतीय सिनेमामा आउँदैछु । फिल्मलाई लिएर निकै उत्साहित छु ।’
यसअघि फिल्मका निर्माता वाई रविशंकरले यो जानकारी दिएका थिए । एक प्रमोशन कार्यक्रमको क्रममा, निर्मातालाई उनको फिल्म ‘रोबिन हुड’ बारे अपडेट सोधिएको थियो । त्यसपछि उनले वार्नरले फ्यानको खुशीका लागि फिल्ममा क्यामियो गरेको बताएका थिए ।
फिल्म ‘रोबिन हुड’मा अभिनेता नितिन मुख्य भूमिकामा देखिनेछन् । यसमा नितिनले एक चोरको भूमिका निर्वाह गरेका छन्, जसले धनीको घरबाट चोरेर त्यो पैसा गरिबलाई बाँडिदिन्छ ।
