— अमेरिकी नेतृत्वको गठबन्धन सेनासँग मिलेर इराकी राष्ट्रिय गुप्तचर सेवाले गरेको कारबाहीमा इराक र सिरियाका लागि इस्लामिक स्टेट (आईएसआईएस) समूहका एक वरिष्ठ नेता मारिएका छन् ।
इराकी प्रधानमन्त्री प्रधानमन्त्री मोहम्मद सिया अल-सुदानीका अनुसार कारबाहीमा ‘इराक र संसारकै सबैभन्दा खतरनाक आतंककारीमध्येका एक’ अबु खादिजाह भनिने अब्दुल्लाह मक्की मुस्लीह अल-रिफाई मारिएका हुन् । अमेरिकी केन्द्रीय कमाण्ड (सेन्टकम) ले इराकको पश्चिमी अल अनबर प्रान्तमा गरेको ‘सटीक हवाई आक्रमण’मा उनको ज्यान गएको हो ।
अमेरिकी केन्द्रीय कमाण्डका अनुसार रिफाई आईएसको निर्णय लिने उच्च निकायका प्रमुख थिए । उनी आईएसले विश्वव्यापी रूपमा गर्ने आक्रमण, गोलीगठ्ठा लगायतका सामाग्री र योजनाका लागि जिम्मेवार थिए । सेन्टकमका अनुसार रिफाईले समूहको विश्वव्यापी संगठनका लागि आर्थिक जोहो र परिचालन गर्दै आएका थिए ।
प्रधानमन्त्री सुदानीले रिफाई मारिएको जनाएसँगै अमेरिकी राष्ट्रपति डोनाल्ड ट्रम्पले अमेरिकाले उनलाई लामो समयदेखि खोजिरहेको बताएका छन् । ‘हाम्रा निडर लडाकुहरूले उनलाई निरन्तर खोजिरहेका थिए,’ उनले भनेका छन् ।
इराकी सरकार र कुर्दिश क्षेत्रीय सरकारसँगको समन्वयमा आईएसआईएसका अर्का सदस्यसँगै उनको दयनीय जीवन समाप्त गरियो । शक्तिद्वारा शान्ति !’ आफ्नो सामाजिक सञ्जाल ट्रुथ सोसियलमा ट्रम्पले लेखेका छन् ।
सेन्टकमका अनुसार कारबाहीपछि रिफाई अन्य एक आईएस कार्यकर्तासँगै मृत फेला परेका थिए । ‘दुवै आतंककारीले विस्फोट नभएको 'आत्मघाती ज्याकेट' लगाएका थिए र उनीहरूसँग धेरै हतियारहरू थिए,’ सेन्टकमले जनाएको छ ।
सेन्टकम र इराकी सेनाहरूले यसअघि गरेको आक्रमणमा भने रिफाई बच्न सफल भएका थिए । तर त्यतिबेला संकलन गरिएको डिएनएका आधारमा उनको पहिचान गरिएको हो । जर्नेल माइकल एरिक कुरिल्लाले रिफाई ‘आईएसको विश्वव्यापी संगठनका सबैभन्दा महत्त्वपूर्ण सदस्यमध्ये भएको बताए ।
‘हामी हाम्रो मातृभूमि र अमेरिकाका साथै यस क्षेत्र र बाहिरका सहयोगी र साझेदार कर्मचारीलाई धम्की दिने आतंककारीलाई मार्न र तिनीहरूका संगठनहरूलाई ध्वस्त पार्न जारी राख्नेछौं,’ उनले भनेका छन् ।
कुनै बेला उत्तर-पूर्वी सिरियादेखि उत्तरी इराकसम्म फैलिएको ८८ हजार वर्गकिलोमिटर भूभाग नियन्त्रणमा लिएको आईएसले करिब ८० लाख मानिसहरूमाथि क्रूर शासन लादेको थियो ।
डिसेम्बर २०१७ मा आईएसमाथि जित हासिल गरेको घोषणा गरेको इराकले २०१९ मा समूहलाई आफ्नो अन्तिम क्षेत्रबाट लखेटेको थियो । तर पनि इराकमा विभिन्न क्षेत्रमा रहेका आईएसले इराकी सेना र प्रहरीविरुद्ध छिटपुट आक्रमण गर्ने गरेका छन् ।
