: इजरायली आक्रमणमा परी उत्तरी गाजाको लाहियामा कम्तिमा ९ जनाको मृत्यु भएको छ। मृत्यु हुनेहरूमा केही परोपकारी संस्थाका कर्मचारीहरू रहेका छन्। सरकारी मिडियाका अनुसार शनिबार भएको उक्त आक्रमण युद्धविराम भएयताको सबैभन्दा ठूलो हो। आक्रमणमा धेरै जना घाइते भएको बताइएको छ।
इजरायलले भने उक्त आक्रमण आतंककारी लक्षित भएको दाबी गरेको छ। गाजाको स्वास्थ्य मन्त्रालयले ९ जनाको मृत्यु भएको र घाइतेमध्ये केही गम्भीर रहेको जनाएको छ। प्यालेस्टिनी पत्रकार संरक्षण केन्द्रका अनुसार मारिनेमध्ये ३ जना गाजामा मानवीय राहत प्रयासबारे दस्तावेजीकरण गर्ने मिडिया टोलीका सदस्य थिए।
हमासले उक्त आक्रमणको कडा निन्दा गरेको छ। निहत्था नागरिकलाई लक्षित गरी गरिएको आक्रमण अन्तर्राष्ट्रिय र मानवीय कानुनको उल्लंघन भएको हमासले आरोप लगाएको छ।
