: युक्रेनका राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनले सबैलाई ढाँटिरहेको बताएका छन्। कुर्स्क क्षेत्र र युद्धविरामका बारेमा पुटिनले सबैसँग झुटो बोलिरहेको जेलेन्स्कीको दाबी छ।
रुसको कुर्स्क क्षेत्रलाई युक्रेनी सेनाले कब्जा गरेको थियो। पछि रुसी सेनाले विस्तारै उक्त क्षेत्र पुनः कब्जा गरेको दाबी रुसको थियो। राष्ट्रपति पुटिनले युक्रेनी सैनिकहरूलाई रुसी सेनाले घेरेको दाबी गरेका थिए। तर, जेलेन्स्कीले त्यस्तो कुनै प्रमाण नरहेको विज्ञप्ति जारी गर्दै भनेका छन्।
उनले युद्धविराम धेरै जटिल रहेको तर्क दिएर पुटिनले संसारलाई झुटो बोलिरहेको बताए। 'साउदीको जेद्दामा भएको वार्तापछि पुटिनले युद्धलाई थप लम्ब्याइरहेका छन्। पुटिन युद्धलाई अझ लम्ब्याउन चाहिरहेका छन्,' जेलेन्स्कीको दाबी छ।
गत साता साउदीको पहलमा जेद्दामा अमेरिका र युक्रेनबीच एक महिनाका लागि युद्धविराम गर्ने सहमति भएको थियो। अमेरिकाले रुसलाई युद्धविरामका लागि मनाउने बताएको थियो। तर, अमेरिकी राष्ट्रपति डोनाल्ड ट्रम्पले दूत पठाएर पुटिनलाई युद्धविरामको प्रस्ताव गरे पनि रुसले इन्कार गर्दै आएको छ।
पुटिनका सहयोगी भनिएका युरी उशाकोवले युक्रेनसँग युद्धविराम गर्न अस्वीकार गरेका थिए। उनले सार्वजनिकरूपमै युक्रेनसँग युद्धविराम नहुने बताएका थिए। युद्धविरामले युक्रेनलाई अस्थायी राहत दिनेबाहेक केही नहुने उनको दाबी थियो।
