: ट्रम्प प्रशासनले ४३ देशका नागरिकलाई अमेरिका यात्रामा प्रतिबन्ध लगाउने तयारी गरेको छ। विभिन्न श्रेणीअन्तर्गत ४३ देशका नागरिकलाई अमेरिका यात्रामा प्रतिबन्ध लगाउने तयारी गरिएको द न्युयोर्क टाइम्सले जानकारी दिएको छ।
अमेरिकाले दक्षिण एसियाका अफगानिस्तान र भुटानका नागरिकलाई भने पूर्णरूपमा प्रतिबन्ध लगाउने तयारी गरेको छ। अमेरिकाको 'रेड लिस्ट'मा अफगानिस्तान र भुटानबाहेक क्युबा, इरान, लिविया, उत्तर कोरिया, सोमालिया, सुडान, सिरिया, भेनेजुयला र येमेन रहेका छन्। यी देशका नागरिकहरूलाई अमेरिका यात्रामा पूर्ण प्रतिबन्ध लगाउने ट्रम्प प्रशासनको तयारी रहेको समाचारमा उल्लेख छ।
त्यस्तै 'ओरेन्ज लिस्ट'मा बेलारुस, इरिट्रिया, हाइटी, लाओस्, म्यानमार, पाकिस्तान, रुस, सेरा लियोन, दक्षिण सुडान र तुर्किमेनिस्तान रहेका छन्। यी देशका नागरिकलाई आंशिक प्रतिबन्ध लगाउने भनिएको छ। त्यहाँका व्यापारीहरूलाई भिसामा सहजता दिइने बताइएको छ।
त्यस्तै 'एलो लिस्ट'मा २२ देश रहेका छन्। जसमा अङ्गोला, कम्बोडिया, क्यामरुन, कङ्गो, लाइबेरिया, माली, जिम्बावेलगायत रहेका छन्। यी सूचीमा केही फेरबदल पनि हुनसक्ने स्रोतलाई उद्धृत गर्दै द न्युयोर्क टाइम्सले जनाएको छ।
