— वीरगन्ज भन्सार कार्यालयले चालु आर्थिक वर्षको ८ महिनामा १ खर्ब ९ अर्ब १६ करोड रुपैयाँ राजस्व संकलन गरेको छ ।


त्यसैगरी, सिर्सिया सुक्खा बन्दरगाह भन्सार कार्यालयले यस अवधिमा ३२ अर्ब २२ करोड रुपैयाँ राजस्व संकलन गर्न सफल भएको छ । लक्ष्यको तुलनामा दुवै भन्सारको राजस्व असुली कम भएपनि असुली दर भने उत्साहजनक रहेको छ ।


वीरगन्ज भन्सार कार्यालयले फागुन मसान्तसम्ममा १ खर्ब ४० अर्ब ३५ करोड ४२ लाख रुपैयाँ राजस्व संकलनको लक्ष्य पाएको थियो । कार्यालयले समीक्षा अवधिमा लक्ष्यको ७७ दशमलव ८ प्रतिशत अर्थात १ खर्ब ९ अर्ब १६ करोड रुपैयाँ राजस्व संकलन गरेको छ ।

फागुन महिनामा मात्र १४ अर्ब ६४ करोड रुपैयाँ राजस्व संकलन गरेको छ । जुन मासिक लक्ष्यको ७९ प्रतिशत हो । यो महिनामा १८ अर्ब ५३ करोड रुपैयाँ राजस्व संकलनको लक्ष्य यो भन्सारले पाएको थियो ।

यता सिर्सिया सुक्खा बन्दरगाह भन्सार कार्यालयले फागुन मसान्त सम्ममा ३८ अर्ब ७७ करोड रुपैयाँ राजस्व संकलनको लक्ष्य पाएकोमा ३२ अर्ब २२ करोड रुपैयाँ राजस्व संकलन गरेको छ । जुन लक्ष्यको ८३ दशमलव ११ प्रतिशत हो ।

फागुन महिनामा मात्र यो भन्सारले ४ अर्ब ६८ करोड रुपैयाँ राजस्व संकलन गरेको छ । जुन मासिक लक्ष्यको ९२ दशमलव २२ प्रतिशत हो । यो महिनामा ३८ अर्ब ७७ करोड रुपैयाँ राजस्व संकलनको लक्ष्य यो भन्सारले पाएको थियो ।

सुक्खा बन्दरगाह भन्सार कार्यालय प्रमुख धनबहादुर बरुवाल फागुन महिना अघिसम्म कार्यालयले गत आर्थिक वर्षका महिनाहरु भन्दा कम राजस्व संकलन गर्दै आएकोमा फागुन महिनादेखि बढी राजस्व संकलन गर्न थालेको बताउँछन् ।



‘चालु आवको फागुन महिनामा गत आवको फागुन महिनाभन्दा ६ करोड २९ लाख रुपैयाँ बढी राजस्व संकलन भएको छ,’ उनले भने, ‘हालकै गतिमा पनि आर्थिक वर्षका बाँकी महिनाहरुमा राजस्व संकलन हुने हो भने वार्षिक राजस्व असुली लक्ष्य भेट्टाउ सम्भव छ ।’

फागुन महिनासम्ममा यो भन्सारले वार्षिक लक्ष्यको ५३ दशमलव ५० प्रतिशत राजस्व संकलन गरेको उनले बताए । बाँकी रहेका चार महिनामा फागुन महिनाकै अनुपातमा पनि राजस्व संकलन भए लक्ष्यको नजिक पुग्न सकिने उनले बताए । बरुवालले राजस्व असुलीमा भइरहेको सुधारले अर्थतन्त्र बिस्तारै लयमा फर्किरहेको संकेत गरेको पनि बताए ।

दुवै भन्सारको राजस्व असुली आयातमुखी रहेको छ । वीरगन्ज भन्सार कार्यालयले इन्धन, नयाँ सवारी साधन आदिको आयातबाट बढी राजस्व संकलन गर्छ भने सुक्खा बन्दरगाह भन्सार कार्यालयले फलामजन्य वस्तु, मदिरा, औद्योगिक कच्चा पदार्थ आदि वस्तुबाट बढी आयात संकलन गर्छ ।