— उपाधि दाबेदारी देखाइरहेको नेपाल पुलिस क्लबले मधेश प्रदेशलाई १९३ रन अन्तरले हराउँदै प्रधानमन्त्री कपमा लगातार चौथो जीत निकालेको छ ।
लमहीस्थित देउखुरी अन्तर्राष्ट्रिय क्रिकेट रंगशालामा शनिबार पुलिस क्लबले दिएको २८९ रनको विशाल लक्ष्य पछ्याएको मधेश प्रदेशको टिम ९५ रन बनाउँदै २६ दशमलव १ ओभरमा अलआउट भएपछि १९३ रनको सहज जित निकालेको हो ।
मधेश प्रदेशलाई सस्तैमा समेट्न खेलमा ललित नारायण राजवंशीले सानदार बलिङ गरेर महत्त्वपूर्ण ५ विकेट लिए ।
पहिलो ओभरको पाँचौं बलमा कप्तान अनिलकुमार साहलाई करण केसीले बोल्ड गर्दै ४ रनमा पेभेलियन फर्काएपछि सुरु भएको विकेट पतन २६ दशमलव १ ओभरमा सकियो ।
मधेशका दिपेश दासले ५९ बल खेल्दै १ छक्का र २ चौकाको मद्दतमा ३१ रन बनाए । रुपेश सिंहले १६ रन र विशाल पटेलले १३ रन बनाए । हरिशंकर शाहले ३ रन, रोशन विकले ८ रन, पवन सर्राफले ३ रन, निखिल सिंहले ७ रन र कमल गुप्ताले १ रन बनाए । अरु खेलाडीले खाता नै खोल्न सकेनन् ।
ललितले ९ दशमलव १ ओभर बलिङ २ मेडनसहित २८ रन खर्चेर पाँच विकेट लिए । उनले मयन यादव, हरिशंकर शाह, रोशन विक, दिपेश दास र पवन सर्राफको विकेट लिए । यस्तै, कुशल भुर्तेलले ३ ओभर बलिङ गर्दै २ मेडनसहित १२ रन दिएर २ विकेट लिए । पुलिसका करण केसी, सागर ढकाल र कप्तान दीपेन्द्रसिंह ऐरीले समान १-१ विकेट लिए ।
टिमलाई भारी रन अन्तरले जिताउन महत्त्वपूर्ण भूमिका खेलेका ललितनारायण राजवंशी 'प्लेयर अफ द म्याच' भए ।
यसअघि, नेपाल पुलिस क्लबका कप्तान दीपेन्द्रसिंह ऐरीले कप्तानी पारी खेल्दै ६३ रन बनाएपछि मधेश प्रदेशको टीमलाई २८९ रनको विशाल लक्ष्य प्रस्तुत गरेको थियो ।
पुलिस क्लबले २८८ रन बनाएको थियो । टस जितेर पहिले ब्याटिङ गरेको नेपाल पुलिस क्लबले ४९ दशमलव ५ ओभरमा सबै विकेट गुमाउँदै २८८ रन बनायो । प्रतियोगितामा अहिलेसम्मकै उच्च रन बनाउन कप्तान दीपेन्द्रसिंह ऐरीले विस्फोटक पारी खेले । उनले ३६ बल खेल्दै ४ छक्का र ५ चौकाको मद्दतमा ६३ रन बनाउँदै विशाल पटेलको बलमा निखिल सिंहको हातबाट क्याच आउट भए ।
यसैगरी आरिफ शेखले ५४ बलमा १ छक्का र ४ चौकाको मद्दतमा ५५ रन बनाउँदै विशाल पटेलकै बलमा कप्तान अनिल साहको हातबाट क्याच आउट भए ।
दीलिप नाथ ४५ रनमा कमल गुप्ताको बलमा एलबीडब्लूको सिकार भए । ओपनर अर्जुन साउदले ४७ रनमा रञ्जित कुमारको बलमा मयन यादवले क्याच आउट गरे ।
पुलिस क्लबका शंकर रानाले २७ रन, रासिद खानले १४ रन र कुशल भुर्तेलले ११ रन बनाए ।
पहिलो विकेटका रुपमा कमल गुप्ताले आठौं ओभरको पहिलो बलमा स्पम्पिङ आउट गर्दै ब्रेकथ्रु गरेपनि तेस्रो विकेटका लागि मधेशका खेलाडीलाई संघर्ष गर्नुपर्यो ।
तेस्रो विकेटका लागि दीलिप नाथ र आरिफ शेखले ५० रनको साझेदारी गरे । यसैगरी दीपेन्द्र र आरिफ बीचको ३२ बलमा ५० रनको अर्को साझेदारी बनेको थियो ।
मधेश प्रदेशका लागि रुपेश सिंहले ८ दशमलव ५ ओभरमा ६२ रन दिएर ४ विकेट लिए । विशाल पटेलले ९ ओभरमा ५७ रन खर्चेर ३ विकेट लिँदा कमल गुप्ताले १० ओभर बलिङ गर्दै ५७ रन दिएर २ विकेट लिए ।
रञ्जित कुमारले ७ ओभरमा १ मेडनसहित ४० रन खर्चेर १ विकेट लिए । यो जितसँगै पुलिस क्लब चार खेलमा अपरााजित हुँदै ८ अंकका साथ शीर्ष स्थानमा उक्लिएको छ ।
मधेश प्रदेश भने ३ खेलमा १ मा जित र दुईमा हार व्यहोर्दै २ अंकका साथ छैठौं स्थानमा झरेको छ ।
यसअघि शुक्रबार भएको खेलमा पुलिसले एपीएफलाई दुई विकेटले हराउँदा ललित नारायण राजवंशीले ७ विकेट लिएका थिए । विभागीय टिम पुलिस क्लबले शुक्रबार डर्बी एपीएफलाई २ विकेटले हराउँदा यसअघि कोशी प्रदेशलाई १५४ रन र लुम्बिनी प्रदेशलाई ८७ रनले हराउँदै पिएम कपको दाबेदारी देखाइरहेको छ ।
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगिता अन्तर्गत अब आइतबार लुम्बिनी प्रदेश र बाग्मती प्रदेश टमबीच बिहान ९ बजे देउखुरी अन्तर्राष्ट्रिय क्रिकेट रंगशालामा खेल हुनेछ ।
३ विभागीय टीम आर्मी क्लब, एपीएफ क्लब र पुलिस क्लबसहित सात प्रदेश टिमले फागुन २५ गतेबाट लुम्बिनी प्रदेशको रुपन्देही र दाङमा प्रतियोगिता खेलिरहेका छन् ।
दाङसहितमा रुपन्देहीको सिद्धार्थ क्रिकेट रंगशाला र एक्स्ट्राटेक ओभल मैदानमा एकैसाथ सुरु भएको प्रतियोगिताका खेलहरु राउण्ड रोविनका आधारमा भइरहेका छन् ।
