— साउदी अरेबिया सरकारको लगानी रहेको कम्पनी ‘स्कोप्ली’ ले चर्चित मोबाइल गेम ‘पोकेमोन गो’ खरिद गर्ने तय भएको छ । पोकेमन निर्माता 'नियान्टिक'ले ३.५ अर्ब अमेरिकी डलरमा आफ्नो यस गेम तथा गेमिङ डिभिजन स्कोप्लीलाई बिक्री गर्न लागेको जनाएको छ । सन् २०१६ को डिसेम्बरमा पोकेमन गो नेपालसहित दक्षिण एसियाली देशहरूमा पनि उपलब्ध भएको थियो ।
पोकेमन गोसँगै नियान्टिकका गेम डेभेलपरहरू र मन्स्टर हन्टर नाउ र पिकमिन ब्लुमजस्ता मोबाइल गेम पनि साउदी कम्पनीकै स्वामित्वमा आउने गरी सम्झौता भएको छ । अग्मेन्टेड रियालिटि (एआर) प्रविधिमा आधारित गेम बनाउने कम्पनीका रूपमा ख्याती कमाएको नियान्टिकले आफ्ना चर्चित गेम साउदी अरेबिया सरकार मातहतको कम्पनीलाई बिक्री गर्नुलाई गेमिङ उद्योगमाझ चासोसाथ हेरिएको छ ।
यो खरिद साउदी अरेबियाको तेलमा निर्भर अर्थतन्त्रलाई विविधीकरण गर्ने रणनीतिअन्तर्गत गरिएको कतिपयको विश्लेषण छ । द गार्जियनका अनुसार साउदीले आफूलाई गेमिङका लागि 'ग्लोबल हब' बनाउने लक्ष्य लिएको छ । यसका लागि साउदी कम्पनीले नियान्टिकको विज्ञता सदुपयोग गर्दै ‘फरेभर गेम्स’ विकास गर्न लागेको जनाएको छ । फरेभर गेम भनेका लामो समयसम्म खेल्न मिल्ने वा कहिल्यै नसकिने र सँधै अपग्रेड हुँदै जाने गेमहरू हुन् ।
पोकेमन गोका हाल विश्वभर १० करोडभन्दा बढी मासिक सक्रिय प्रयोगकर्ता छन् । सन् २०१६ मा यो गेम रिलिज हुँदा पहिलो वर्ष नै ५० करोडभन्दा धेरैले डाउनलोड गरेका थिए । सन् २०२० मा कोभिड लकडाउनपछि भने यसको क्रेज घट्यो । लकडाउनमा बाहिर निस्किन नमिल्ने भएपछि यो गेम खेल्न समस्या भएको थियो । यसमा खेलाडी (पोकेमन ट्रेनर)हरूले जीपीएस लोकेसन र डेटा अन गरेर नक्सामा देखाइएका पोकेस्टपहरूमा गएर पोकेमन खोज्ने, समात्ने र तिनलाई बलियो बनाएर ब्याटल गर्ने गर्छन् ।
पोकेमन गो एआर प्रविधिमा निर्माण गरिएको हुँदा यसमा भर्चुअल र वास्तविक दुवै दुनियाँको संयोजन हुन्छ । खेलका क्रममा फोनको क्यामेरा कुनै ठाउँमा प्वाइन्ट गर्दै जाँदा पोकेमन देखिन सक्छन्, त्यसरी पोकेमन खोज्दै जानुपर्छ । ती पोकेमनलाई समात्दा खेलमा नम्बर प्राप्त हुन्छ । कुनै बेला पोकेमन खेल्ने क्रममा कतिपय खेलाडी हराएका, दुर्घटनामा परेका, पोलमा ठोक्किएर घाइते भएका समाचार समेत बाक्लै आउने गर्थे ।
पोकेमन गोको बिक्रीले गेमिङ उद्योगमा एआर र लाइभ-सर्भिस गेमहरूको महत्व बढ्दै गएको देखाउँछ । साथै, सरकारी लगानीहरूले गेमिङको भविष्यमा निर्णायक भूमिका खेल्नसक्ने संकेत पनि गरेको अर्कोथरी विश्लेषण छ । यसले पोकेमोन गोको भविष्यलाई सुरक्षित गर्नुका साथै साउदी अरेबियालाई विश्व गेमिङ बजारमा महत्त्वपूर्ण खेलाडीको रूपमा उभ्याउने अनुमान गरिएको छ ।
