: प्रधानमन्त्री कप क्रिकेट प्रतियोगितामा त्रिभुवन आर्मी क्लबले विजयी सुरुवात गरेको छ। बागमती प्रदेशमाथि १३४ रनको फराकिलो जित निकाल्दै आर्मीले प्रतियोगितामा सुखद सुरुवात गरेको हो।
सिद्धार्थनगरस्थित सिद्धार्थ रंगशाला त्रिभुवन आर्मी क्लबले दिएको २६३ रनको बलियो लक्ष्य पछ्याएको बागमती २७ ओभरमा १२८ रन बनाउँदै अलआउट भएको हो। बागमतीका लागि विवेक राना मगरले ५१ रनको अर्धशतकीय पारी खेले पनि त्यो जितको लागि पर्याप्त भएन।
ओपनर आशुतोष घिरौयाले १० रन बनाउँदा अर्का ओपनर शुभ कंसाकर ३ रनमै आकाश चन्दको बलमा एलबीडब्ल्यु आउट भए। इशान पाण्डेले १९ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्। आर्मीका लागि स्पिनर साहब आलमले सर्वाधिक ४ विकेट लिए। आकाश चन्दले ३ विकेट लिँदा सोमपाल कामी, नरेन साउद र वसिर अहमदले समान १–१ विकेट लिए।
त्यसअघि टस जितेर ब्याटिङ गरेको आर्मीले निर्धारित ५० ओभरमा ८ विकेट गुमाउँदै २६२ रन बनाएको थियो। आर्मीका लागि ओपनर ब्याटर सन्तोष कार्कीले सर्वाधिक ७६ रन बनाए। उनले ९८ बलमा १० चौका र १ छक्का प्रहार गरेका हुन्। अर्का ओपनर तीर्थ राज दासले ३६ रन बनाए।
विवेक यादवले ३० रन बनाए। कुशल मल्ल २६ रनमा क्याच आउट भए। कप्तान विनोद भण्डारी ४७ रनमा र आकाश चन्द १ रनमा अविजित रहे। अन्य कुनै ब्याटरले दोहोरो अंकमा रन बनाउन सकेनन्। बागमतीका लागि रिजन ढकाल, इशान पाण्डे र प्रतिश जिसीले समान २–२ विकेट लिए। सोनु देवकोटाले १ विकेट लिए। यो बागमतीको लगातार दोस्रो हार हो। बागमतीले प्रतियोगिताको पहिलो खेलमा एपीएफसँग हार बेहोरेको थियो।
