: अमेरिकी राष्ट्रपति डोनाल्ड ट्रम्पले युक्रेनसँग भन्दा रुससँग शान्ति सम्झौता गर्न सजिलो भएको बताएका छन्। शुक्रबार ह्वाइट हाउसमा आयोजित पत्रकार सम्मेलनमा ट्रम्पले रुसी राष्ट्रपति पुटिनमाथि विश्वास भएको उल्लेख गरेका छन्।
उनले पुटिन युद्ध अन्त्य गर्न चाहने कुरामा आफूहरु विश्वस्त रहेको जनाए।
ट्रम्पले युक्रेनसँग व्यवहार गर्न गाह्रो हुँदै गइरहेको बताए। युक्रेनसँग धेरै विकल्पहरू नभएको बताउँदै उनले भने, 'युद्ध सकेसम्म चाँडो अन्त्य होस् भन्ने उद्देश्यले हामीले युक्रेनमाथि थप दबाब दिइरहेका छौं।'
अमेरिकी राष्ट्रपतिको पदभार ग्रहण गरेदेखि डोनाल्ड ट्रम्पले रुस-युक्रेन युद्ध रोक्न काम गर्ने कुरा निरन्तर बताउँदै आएका छन्। यस महिनाको सुरुमा युक्रेनी राष्ट्रपति जेलेन्स्की र अमेरिकी राष्ट्रपति ट्रम्पको ह्वाइटहाउसमा भेटवार्ता भएको थियो।
ओभल अफिसमा भएको उक्त भेटमा जेलेन्स्की र ट्रम्पबीच विवाद सिर्जना भएको थियो। मिडियाकै अगाडि दुई जनाबीच चर्को बहस भएर वार्ता सफल हुन सकेको थिएन।
