— युगान्डामा हुने महिला टी–२० आई क्रिकेट शृंखलाका लागि नेपाली महिला राष्ट्रिय क्रिकेट टोली बुधबार त्यसतर्फ प्रस्थान गरेको छ । मूलपानीस्थित नेपाल क्रिकेट संघ (क्यान) को मुख्यालयमा सचिव पारस खड्का, प्रवक्ता छुम्बी लामालगायतले टोलीको बिदाइ गरे ।
मार्च ८ देखि १६ सम्म हुने शृंखलामा नेपालसहित युगान्डा, हङकङ र नामिबियाको सहभागिता रहनेछ । डबल राउन्ड रोबिनमा प्रतिस्पर्धा गरेपछि शीर्ष दुई टोलीले फाइनलमा स्थान बनाउने छन् । नेपालले मार्च ८ मा नामिबियासँग पहिलो खेल खेल्नेछ ।
मार्च ९ मा युगान्डासँग खेल्ने नेपालले हङकङसँग मार्च १० मा खेल्ने तालिका छ । अर्को चरणमा नेपालले नामिबियासँग मार्च १२ मा, युगान्डा १३ मा र हङकङसँग १४ मा खेल्नेछ ।
इन्दु बर्माको कप्तानीमा नेपाली टोली रहेको छ । १४ सदस्यीय टोलीमा सना प्रविन र रिया शर्माले सिनियर टोलीमा पहिलो पटक स्थान पाएका छन् । अन्य खेलाडीमा रुबिना क्षेत्री, विन्दु रावल, पूजा महतो, सम्झना खड्का, ममता चौधरी, राजमति ऐरी, रोमा थापा, रचनाकुमारी चौधरी, कविता जोशी, ईश्वरी विष्ट, एलिसाकुमारी यादव (विकेटकिपर) छन् ।
नेपालले गत महिना घरेलु मैदानमा थाइल्यान्ड र नेदरल्यान्ड्सविरुद्धको शृंखला खेलेको थियो । सन् २०२६ मा महिला टी–२० विश्वकप क्रिकेट हुनेछ । त्यसका लागि यही वर्ष छनोट प्रतियोगिता हुनेछ । एसिया क्षेत्रको छनोट मे महिनामा हुनेछ । त्यसकै तयारीस्वरुप यो शृंखला खेल्न लागिएको हो ।
