— अस्ट्रेलियाका पाँच सहरमा आइतबारदेखि नेपाल महोत्सव आयोजना हुँदैछ । दक्षिण अस्ट्रेलियाबाट सुरु हुने महोत्सवमा नेपाली सांगितिक समूह 'कन्दरा'ले करिब एक दशकपछि प्रस्तुति दिने भएको छ ।
प्रवासी नेपालीको संगठन एनआरएनएले नेपाल महोत्सवको आयोजना गर्ने गरेको छ । यसपहिले सिड्नी, पर्थ र डार्विनमा नेपाल महोत्सव सम्पन्न भइसकेको छ । दक्षिण अस्ट्रेलियाको एडिलेडबाट सुरु हुने नेपाल महोत्सव ब्रिसबनमा गएर टुंगिनेछ ।
सबै महोत्सवमा 'कन्दरा'ले प्रस्तुति दिने तय भएको छ । 'कन्दरा'का मुख्य गायक विवेक श्रेष्ठसहितको टोलीले यहाँका पाँचवटै राज्यलाई नेपाली संगीतमय बनाउनेछन् । कन्दराले सन् २०१६ मा आयोजना गरिएको नेपाल महोत्सवका क्रममा विभिन्न सहरमा सांगितिक प्रस्तुति दिएका थिए ।
अस्ट्रेलियामा झन्डै दुई दशकदेखि नेपाल महोत्सव हुँदै आएको छ । नेपाली कला संस्कृति र पर्यटनको प्रवर्धन, भेषभूषा, संगीत र खानाको स्वाद दिलाउने उद्देश्यले नेपाल महोत्सवको आयोजना गरिँदै आएको छ ।
यही आइतबार एडिलेडको पर्यटकीय सहर एल्डर्स पार्कबाट सुरु हुने महोत्सव मेलबर्नको फेडेरेसन स्क्वायर, क्यानबेराको स्टेज ८८ कमनवेल्थ पार्क, होर्बाटको पार्लियामेन्ट हाउस लन र ब्रिसबनको किङ जर्ज स्क्वायरमा अप्रिलको ६ तारिखमा सम्पन्न हुने एनआरएनएका प्रवक्ता बविन मिश्रले जानकारी दिएका छन् ।
महोत्सवलाई नेपालको पर्यटकीय क्षेत्रका बारेमा जानकारी दिन प्रत्येक महोत्सवमा नेपाल हाउसको स्थापना गरिनेछ भने नेपालको संस्कृति, भेषभूषा तथा परम्पराको जानकारी दिन सांस्कृतिक परेडको आयोजना हुनेछ । एडिलेडमा यही आइतबार हुने नेपालको महोत्सवको व्यवस्थापनको संयोजन गरिरहेका विनोद बानियाँ महोत्सवको माध्यमबाट यहाँका बहुसांस्कृतिक समुदायलाई नेपालको बारेमा थप जानकारी मिल्ने बताउँछन् ।
‘नेपाल महोत्सवले नेपाल र नेपालीको प्रवर्धन गर्ने मात्र हैन कि यहाँको बहुसांस्कृतिक समुदायसँगको सम्बन्धलाई अझ प्रगाढ बनाएको छ,’ बानियाँले भने । आइतबार हुने महोत्सवको सबै तयारी पूरा भएको र १० हजार बढीले सहभागिता जनाउने उनले विश्वास व्यक्त गरे ।
महोत्सवका लागि राज्य सरकारले समेत उल्लेख्य सहयोग गरेको छ । एनआरएनए राज्यका संयोजक संजय पुरीले यस वर्ष दक्षिण अस्ट्रेलिया सरकारले करिब ३३ हजार डलर सहयोग गरेको र अन्य रकम प्रायोजन, स्टल लगायतका माध्यमबाट संकलन गरिएको जानकारी दिए । १ लाख ५० हजार डलर खर्च हुने अनुमान गरिएको महोत्सवमा नेपाली राजदूतका साथै राज्य तथा केन्द्रका मन्त्री तथा सांसदको उपस्थित हुने पुरीले जानकारी दिए ।
