: सुनसरीको दुहबी नगरपालिकामा बंगुरको मासु बिक्री वितरणमा प्रतिबन्ध लगाइएको छ। स्थानीय किसानले व्यावसायिक रूपमा पालेका बंगुरमा अफ्रिकन स्वाइनफ्लुको संक्रमण भेटिएपछि फागुनभरी बंगुरको मासु बिक्री वितरणमा रोक लगाइएको सुनसरीका प्रमुख जिल्ला अधिकारी धर्मेन्द्रकुमार मिश्रले बताए। उनले दुहबी क्षेत्रमा जिउँदो बंगुर पनि बिक्री वितरण गर्न प्रतिबन्ध लगाइएको बताए।
दुहबी नगरपालिका ९ र १० किसानहरूले पालेका बंगुरहरुमा अफ्रिकन स्वाइनफ्लु देखिएको डीएसपी योगराज खतिवडाले बताए। स्वाइन फिभर देखिएपछि दुहबी नगरपालिकाले स्थानीय प्रहरी प्रशासनका प्रतिनिधि राखेर बैठक बसि जिउँदो बंगुर र सुंगुर तथा मासु बिक्री वितरणमा प्रतिबन्ध लगाइएको उनले बताए।
दुहबी एरियामा किसानले पालेका ३० वटा भन्दा बढी उन्नत जातका बंगुर मरेको पनि डीएसपी खतिवडाले बताए। उनले रोग लागेका बंगुरहरु बिक्री वितरण गर्दा अन्यत्र पनि यसको प्रकोप फैलन सक्ने भन्दै प्रहरी परिचालन गरि २४ सै घण्टा निगरानी बढाएर मासु बिक्री वितरण गर्न प्रतिबन्ध लगाइएको बताए।
नगरपालिकाका मेयर वेद नारायण गच्छदारका अनुसार स्थानीय किसानहरू आसनारायण चौधरी, गौरी सदा, बिक्रम चौधरी, सितल चन्द्र चौधरी लगायतले पालेका सुंगुर र बंगुरहरुमा अफ्रिकन स्वाइनफ्लु देखिएकाले यसको नियन्त्रणको प्रयास भइरहेको बताए।
नगरपालिकाका स्वास्थ्य शाखा प्रमुख विन्देश्वर मेहताले बंगुर मर्न थालेपछि ल्याब टेष्ट गर्न काठमाडौं स्थित केन्द्रीय प्राविधिक ल्याब पठाउँदा अफ्रिकन स्वाइन फ्लु पुष्टि गरेको जानकारी दिए। उनले रोग लागेको स्थानहरूमा औषधि उपचारको काम भइरहेको बताए।
सक्रमण देखिएको स्थानमा प्रहरी सहितको पशु चिकित्सकहरुको टोली परिचालन गरि बंगुरको खोरहरुमा औषधि चर्कने र बंगुरहरूको स्वास्थ्य परीक्षण गर्ने काम भइरहेको मेहताले बताए। पीडित किसानहरूले अफ्रिकन स्वानफ्लुको नियन्त्रण र क्षतिपूर्ति दिन माग गरेका छन्।
