— युक्रेनी राष्ट्रपति भ्लोदिमिर जेलेन्स्कीले रुसले युक्रेनविरुद्ध हवाई आतंक जारी राखेको आरोप लगाएका छन् । युक्रेनले शान्ति चाहेको तर रुस युद्ध जारी गर्ने पक्षमा रहेको जेलेन्स्कीको भनाइ छ ।
‘युक्रेन एक सामान्य र सुरक्षित जीवनका लागि लडिरहेको छ,’ जेलेन्स्कीले सामाजिक सञ्जालमा लेखेका छन्, ‘हामी यो युद्ध समाप्त होस् भन्ने चाहन्छौं । तर रुसले हवाई आतंक जारी राखेको छ ।’ रुसले शान्ति नचाहेको र युक्रेनमाथि आक्रमण जारी राखेको जेलेन्स्कीको भनाइ छ ।
‘यदि तपाईं वार्ता गर्न चाहनुहुन्छ भने, बलिस्टिक क्षेप्यास्त्रले मानिसहरूलाई लक्षित नगर्नुहोस् । युक्रेनमाथि रुसी आक्रमण रोक्न हामीले संसारलाई अझ एकजुट र बलियो बनाउन आवश्यक छ,’ जेलेन्स्कीले भनेका छन् ।
रुसले गत साता युक्रेनमा १ हजार ५० भन्दा बढी आक्रमण ड्रोन आक्रमण गरेको थियो । उक्त अवधिमा १ हजार ३ सय बम र २० भन्दा बढी क्षेप्यास्त्रहरू प्रहार गरेको जेलेन्स्कीको दाबी छ ।
जलेन्स्कीका अनुसार पछिल्लो २४ घण्टामा रुसले गरेका आक्रमणमा दक्षिणी खेर्सनमा ५ जनाको ज्यान गएको र १३ जना घाइते भएका छन् । त्यस्तै, दोनेत्स्क क्षेत्रमा गरिएको आक्रमणमा २ जनाको ज्यान गएको उनले बताए । आक्रमणमा ३ जना घाइते भएका र दर्जनौं घरमा क्षति पुगेको उनको भनाइ छ ।
