— युक्रेनी राष्ट्रपति भ्लोदिमिर जेलेन्स्कीले आफू अझै पनि अमेरिकासँग खनिज सम्झौता गर्न तयार रहेको बताएका छन् । तर त्यसका लागि युक्रेनले सुरक्षाको प्रत्याभूति पाउनुपर्ने उनको भनाइ छ ।
ह्वाइट हाउसमा भएको भेटवार्ताका क्रममा अमेरिकी राष्ट्रपति डोनाल्ड ट्रम्प र उपराष्ट्रपति जेडी भेन्ससँगको चर्काचर्कीपछि बेलायत पुगेका जेलेन्स्कीले पत्रकारहरूसँग कुरा गर्दै अमेरिकासँग मिलेर अघि बढ्न तयार रहेको बताएका हुन् । तर शान्ति सम्झौताका नाममा युक्रेनले रुसलाई कुनै पनि भू–भाग नछोड्ने उनको भनाइ छ ।
उनले अमेरिकासँग अझै पनि रचनात्मक वार्ता गर्न इच्छुक रहेको बताएका हुन् । ‘हामी चाहन्छौं कि हाम्रा साझेदारहरूले यो युद्धमा आक्रमणकारी को हो भनेर याद गरोस्,’ उनले पत्रकारहरूलाई भने ।
बेलायती प्रधानमन्त्री केयर स्टार्मरको नेतृत्वमा आइतबार लन्डनमा आयोजित शिखर सम्मेलनमा युरोपेली देशका नेताहरू युक्रेन युद्ध रोक्न अमेरिकासँग छलफल गर्न तयार देखिएका छन् । उनीहरूबीच युक्रेन शान्ति योजनाको मस्यौदा तयार पार्ने र अमेरिकी राष्ट्रपति ट्रम्पसँग छलफल गर्ने सहमति भएको हो । सम्मेलनमा जेलेन्स्कीसँगै फ्रान्सका राष्ट्रपति इमानुएल म्याक्रों, युरोपेली आयोगकी अध्यक्ष उर्सुला भान डेर लियोन, युरोपेली परिषद्का अध्यक्ष एन्टोनियो कोस्टालगायत १८ युरोपेली देशका राष्ट्र तथा सरकार प्रमुखहरू उपस्थित थिए ।
बेलायती प्रधानमन्त्री स्टार्मरले युक्रेन युद्ध अन्त्य गर्न र युद्धग्रस्त देशलाई रुसी अतिक्रमणबाट जोगाउने भन्दै चारबुँदे योजना अघि सारेका छन् । स्टार्मरले अघि सारेको योजनामा रुसमाथि आर्थिक दबाब बढाइरहने र युक्रेनमा सैन्य सहायता जारी राख्ने, युक्रेन शान्ति वार्तामा उपस्थित हुने र वार्तामार्फत युक्रेनको सार्वभौमसत्ता र सुरक्षा सुनिश्चित गर्ने, भविष्यमा हुने कुनै पनि आक्रमण रोक्न युक्रेनको रक्षात्मक क्षमता बढाउने र सम्झौतापछि पनि युक्रेनमा शान्ति कायम गर्न गठबन्धन गर्ने उल्लेख छ ।
प्रधानमन्त्री स्टार्मरले गठबन्धनमा बेलायत र फ्रान्ससँगै अन्य देशहरू पनि सहभागी हुने र युक्रेनको समर्थनमा अमेरिकालाई पनि सहभागी गराउन प्रयास गरिने बताएका छन् । यद्यपि उनले युक्रेनलाई सहयोग गर्न इच्छुक देशहरूको गठबन्धनमा सहभागी हुन सहमति जनाएका देशबारे केही उल्लेख गरेका छैनन् । तर शान्ति सम्झौताका विषयमा अबको रणनीतिका विषयमा भने युरोपेली देशहरू अमेरिकी प्रतिक्रियाको पर्खाइमा देखिएका छन् ।
सम्मेलनपछि युक्रेनी राष्ट्रपति जेलेन्स्कीले ‘युक्रेनले बलियो साथ पाएको महसुस भएको र लामो समयपछि उच्चस्तरको युरोपेली एकता देखिएको’ प्रतिक्रिया दिएका छन् । ‘शान्ति र सुरक्षाको सुनिश्चितताका लागि युरोपमा हामी सबै मिलेर अमेरिकासँग पनि सहकार्यको आधार तयार गर्न काम गरिरहेका छौं,’ जेलेन्स्कीले भने । स्टार्मरले युक्रेनका लागि थप १ अर्ब ६० करोड पाउन्ड बराबरको सहयोगको घोषणा पनि गरेका छन् । उक्त सहयोग युक्रेनले हवाई प्रतिरक्षा क्षेप्यास्त्र खरिदका लागि खर्च गर्ने जनाइएको छ । यसअघि स्टार्मर र जेलेन्स्कीले २ अर्ब २६ करोडको सहयोग सम्झौता गरेका थिए । फ्रान्सले भने युद्धरत रुस र युक्रेनलाई एक महिनाका लागि हतियार बिसाउन आग्रह गरेको छ । फ्रान्सेली राष्ट्रपति म्याक्रोंले आइतबार साँझ एक प्रस्ताव राख्दै युद्धरत राष्ट्रहरूबीच हावा, समुद्र र ऊर्जा पूर्वाधारमा युद्धविराम चाहेको जनाएका छन् ।
रुसी राष्ट्रपति कार्यालय क्रेमलिनका प्रवक्ता दिमित्री पेस्कोभले भने रुसले उद्देश्य प्राप्त नगरेसम्म युक्रेनमा सैन्य कारबाही जारी राख्ने चेतावनी दिएका छन् । युक्रेन युद्ध अन्त्य गर्ने विषयमा कुनै पनि एजेन्डामा समन्वय वा पहल सुरु नभएको उनको भनाइ छ । लन्डनमा आइतबार आयोजित शिखर सम्मेलनमा सहभागी देशहरूले युक्रेन युद्ध जारी राख्न चाहेको प्रवक्ता पेस्कोभको दाबी छ । ‘ती देशहरूको एउटा समूह स्पष्ट रूपमा युद्धको पक्षधर हो । ती देशहरू युक्रेन युद्ध जारी राख्न र सैन्य कारबाहीका लागि आपूर्तिहरू प्रदान गर्न समर्थन गर्दै छन्,’ उनले भनेका छन् ।
