— मछिन्द्र क्लबले नेपालको घरेलु फुटबलमा सोमबार दुर्लभ ऐतिहासिक सफलता चुमेको छ । मछिन्द्रले लगातार तेस्रोपल्ट केपी ओली कप जितेर यो अद्वितीय उपलब्धि आत्मसात् गरेको हो । दुईपल्टको च्याम्पियन मछिन्द्रले सोमबार दशरथ रंगशालामा सम्पन्न प्रतियोगिताको फाइनलमा त्रिभुवन आर्मी क्लबलाई २–० ले पराजित गरेको थियो ।
यससँगै मछिन्द्रले प्रतियोगिताको उपाधिमाथि ह्याट्रिक गरेको छ । मछिन्द्रले प्रतियोगिताका तीनै संस्करणमा आफ्नो लगातार जित यात्रा पनि कायम राख्यो । यसपालि फाइनल जितमा एक गोल आत्मघाती गोलको रूपमा प्राप्त भएको थियो । अर्को गोल भने स्टेफन जलीको नाममा रह्यो ।
खेलको २९ औं मिनेटमा मछिन्द्रले अग्रता लिएको थियो । विमल पाण्डेको आत्मघाती गोलमा मछिन्द्रको अग्रता सम्भव भएको थियो । विमलले सनिश श्रेष्ठको प्रहार
क्लियर गर्ने प्रयासमा बलले दुर्भाग्यपूर्ण रूपमा पोस्टको दिशा लिएको थियो । स्टेफनले ७२ औं मिनेटमा दोस्रो गोल थपे । मल्लिक युसुफको निकालेको पासमा यो गोल निस्केको हो ।
उपाधिको निर्णायक भिडन्तमा आर्मीले बलियो चुनौती पेस गर्न सकेनन् । मछिन्द्रले खेलको पहिलो हाफ लगभग आफ्नो नियन्त्रणमा राखेको थियो । मछिन्द्रले सेमिफाइनलमा केपी ओली एफसीलाई हराएको थियो । त्यसअघि टोलीले भुटान एफसी ट्रान्सपोर्ट युनाइटेडलाई पराजित गरेको थियो । उपाधिसँगै मछिन्द्रले १५ लाख ११ हजार १ सय ११ रूपैया जितेको छ । उपविजेता आर्मीले ५ लाख रुपैयाँ हात पार्यो । राष्ट्रिय युवा संघ नेपालको आयोजनामा भएको प्रतियोगितामा दुई विदेशीसहित ९ टिमको सहभागिता रहेको थियो । प्लेयर अफ द म्याच मछिन्द्रका छिरिङ गुरुङ भए ।
उत्कृष्ट गोलकिपरमा मछिन्द्रका विशाल श्रेष्ठ चुनिए भने इमर्जिङ प्लेयर आर्मीका निराजन धामी भए । सर्वाधिक गोलकर्ताको पुरस्कार मछिन्द्रका स्टेफन जामाहाले पाए । विधागत उत्कृष्ट खेलाडीले जनही ५० हजार नगद र यामाहाको मोटरसाइकल पुरस्कार प्राप्त गरे । सर्वोत्कृष्ट खेलाडीको पुरस्कार मछिन्द्रका सनिश श्रेष्ठले पाए । उनले एक लाख र यामाहा मोटरसाइकल जिते । विजेता टोलीलाई विशेष अतिथि रहेका इटालियन भेट्रान गोलरक्षक जियानलुइजी बुफोन, प्रधानमन्त्री केपी शर्मा ओलीलगायतले पुरस्कृत गरेका थिए ।
