: पर्साको कालिकामाई गाउँपालिका-४ कटिबलुवास्थित नेपाल राष्ट्रिय माध्यमिक विद्यालयमा सोमबार २५ भन्दा बढी विद्यार्थीहरू अचानक बेहोस भएका छन्।
सोमबार बिहान प्राथना सकिएपछि कक्षाकोठामा पठनपाठन सुरु भएलगत्तै विद्यार्थीहरू बेहोस भएका हुन्। विद्यालयको कक्षा ६ देखि १० सम्मका २५ भन्दा बढी विद्यार्थी अचानक बेहोस भएको गाउँपालिका अध्यक्ष बशीष्ट प्रसाद कलवारले बताए।
कक्षाकोठामा बेहोस भएका विद्यार्थीहरूलाई उपचारका लागि पोखरियास्थित पोखरिया अस्पतालमा पुर्याइएको र अहिले १ जना बाहेक अरू सबैको अवस्था खतरामुक्त रहेको कलवारले बताए। उनका अनुसार विद्यार्थीहरू बेहोस हुनुको कारण खुल्न सकेको छैन। विद्यार्थीहरु बेहोस भएपछि विद्यालय बन्द गरिएको गाउँपालिका अध्यक्ष कलवारले बताए।
