: अमेरिकाको लस एन्जलसमा ओस्कर अवार्ड समारोह सम्पन्न भएको छ। यस वर्ष यौनकर्मीको कथामा आधारित फिल्म 'अनोरा' ले पाँच विधामा अवार्ड जितेको छ।
अनोरा यस वर्षको उत्कृष्ट चलचित्र बनेको छ। त्यस्तै उत्कृष्ट निर्देशक र उत्कृष्ट अभिनेत्रीको पुरस्कार पनि यही सिनेमाका निर्देशक र अभिनेत्रीले पाएका छन्।
फिल्मकी अभिनेत्री मिकी म्याडिसनले उत्कृष्ट अभिनेत्रीको अवार्ड प्राप्त गरेकी छिन्। यस फिल्मका लागि शन बेकरले उत्कृष्ट निर्देशकको पुरस्कार पाएका छन्। यो फिल्मले उत्कृष्ट सम्पादनको अवार्ड पनि पाएको छ।
'द ब्रुटालिस्ट'मा गरेको उत्कृष्ट अभिनयको लागि एड्रियन ब्रोडीले उत्कृष्ट अभिनेताको अवार्ड जितेका छन्। 'द ब्रुटालिस्ट' ले उत्कृष्ट छायांकनको अवार्ड पनि हात पारेको छ। उक्त पुरस्कार बेलायतका लोल क्राउलीले प्राप्त गरेका हुन्।
ओस्करमा जोई साल्दानाले उत्कृष्ट सह-अभिनेत्रीको अवार्ड जितेकी छन्। यो जोई साल्डानाको पहिलो ओस्कर अवार्ड हो। 'एमिलिया पेरेज' मा उत्कृष्ट अभिनय गरेबापत उनले यो पुरस्कार प्राप्त गरेकी हुन्।
ओस्कर अवार्ड प्राप्त गरेपछि जोई सलदानाको आँखा आँसुले भरिएको थियो। उनी खुसीले रोएकी थिइन्।
उनले भनिन्, 'म यो पुरस्कार प्राप्त गर्ने डोमिनिकन मूलको पहिलो अमेरिकी हुँ, मलाई थाहा छ म यो पुरस्कार प्राप्त गर्ने अन्तिम व्यक्ति हुनेछैन।'
यसैबीच ब्राजिलियन फिल्म 'आई एम स्टिल हियर' ले सर्वश्रेष्ठ अन्तर्राष्ट्रिय फिचर अवार्ड जितेको छ।
यो फिल्म ब्राजिलका राजनीतिज्ञ रुबेन्स पाइभाको बेपत्ता भएको वास्तविक घटनामा आधारित छ।
यस समारोहमा ड्युन: पार्ट टु ले दुई ओस्कर पुरस्कार प्राप्त गरेको छ। यसले सर्वश्रेष्ठ ध्वनि र सर्वश्रेष्ठ दृश्य प्रभावमा ओस्कर जितेको छ। ड्युन: पार्ट टु फ्र्याङ्क हर्बर्टको उपन्यास ड्युनमा आधारित चलचित्र हो। यो फिल्मले पहिले नै धेरै प्रशंसा बटुलिसकेको छ।
