— अमेरिकामा कागजातविहित आप्रवासी फर्काउनेसँगै कानुनी प्रक्रिया पुरा गरेकालाई नागरिक बनाउने प्रावधान पनि छ । अमेरिकी सरकारले बर्सेनी लाखौं आप्रवासीलाई ग्रिन कार्ड प्रदान गर्छ । ग्रिन कार्डको अवधि ४ वर्ष पारगरी कानुनी प्रक्रिया पुरा गरेकाले भने नागरिकता पाउँछन् ।
अमेरिकामा ग्रिन कार्ड लिएर बसोबास गर्दै आएका आप्रवासीमध्ये सन् २०२४ मा मात्र ८ लाख भन्दा बढी अमेरिकी नागरिक बनेका छन् । कागजात र प्रक्रिया पूरा गरेका आप्रवासीले कानुनअनुसार नागरिकता पाएसँगै उनीहरू अमेरिकी नागरिक बनेका हुन् ।
युएस सिटीजनसीप एण्ड इमिग्रेसन सर्भिसेज् (युएससीआईएस)ले वेवसाइटमार्फत २०२४ मा मात्र ८ लाख १८ हजार ५ सय आप्रवासीले नागरिकता पाएको तथ्यांक सार्वजनिक गरेको हो । जसमध्ये १८ देखि ६५ वर्षसम्मका ४ लाख ४९ हजार २ सय पुरुष, ३ लाख ६५ हजार ६ सय महिला र ३ हजार ७ सय अन्य छन् ।
तथ्यांकअनुसार जनवरी २०२४ मा ६८ हजार ५ सय, फ्रेबुअरीमा ६९ हजार ५ सय, मार्चमा ७७ हजार २ सय, अप्रिलमा ७१ हजार ७ सय, मेमा ७६ हजार ३ सय, जुनमा ६९ हजार ९ सय, जुलाइमा ६७ हजार ४ सय, अगस्तमा ६४ हजार ८ सय, सेप्टेम्बरमा ७२ हजार ९ सय, अक्टोबरमा ६३ हजार ३ सय, नोभेम्बर ६३ हजार ९ सय र डिसेम्बर ५३ हजार ५ सय आप्रवासी अमेरिकी नागरिक बनेका हुन् ।
नागरिक बन्ने आप्रवासीमा मेक्सीकोका १ लाख ७ हजार ७ सय, भारतका ४९ हजार ७ सय, फिलिपिन्सका ४१ हजार २ सय, डोमिनिकन रिपब्लिकन ३९ हजार ९ सय, क्युवा ३३ हजार ७ सय, भियतनामका ३३ हजार ४ सय, चीनका २४ हजार ३ सय, इल साल्भाडोरका २१ हजार ९ सय, जमाइकाका २० हजार, कोलम्बियाका २७ हजार ९ सय र बाँकी ४ लाख २८ हजार ८ सय विभिन्न देशका रहेको युएससीआईएसको तथ्यांक छ ।
२०२४ सहित ११ वर्ष अवधिमा ८५ लाख ४८ हजार ८० आप्रवासीले नागरिकता पाएका छन् । जसमध्ये २०२३ मा ८ लाख ७८ हजार ६ सय, २०२२ मा ९ लाख ६९ हजार र २०२१ मा ८ लाख १४ हजारले नागरिकता पाएका छन् । सन् २०२० मा ६ लाख २८ हजार, २०१९ मा ८ लाख ४३ हजार ६ सय ९३, २०१८ मा ७ लाख ६१ हजार ९ सय १, २०१७ मा ७ लाख ७ हजार २ सय ६५, २०१६ मा ७ लाख ५३ हजार ६०, २०१५ मा ७ लाख २० हजार ६ सय ४५ र २०१४ मा ६ लाख ५३ हजार ४ सय १६ आप्रवासी अमेरिकी नागरिक बनेका थिए ।
युएससीआईएसले नागरिक बन्ने आप्रवासीमध्ये सबै भन्दा बढी संख्या रहेको १० देशको नामसहित सार्वजनिक गरेको तथ्यांकमा नागरिकता पाउने नेपालीको संख्या भने उल्लेख गरेको छैन । ‘संयुक्त राज्य अमेरिकाले विश्वका सबै भागबाट आप्रवासीहरुलाई स्वागत गर्ने लामो इतिहास छ । बितेको एक दशकमा हामीले ७९ लाखभन्दा बढी अंगीकृत नागरिकलाई हाम्रो राष्ट्रको संरचनामा स्वागत गरेका छौं,’ युएससिआईएसले वेबसाइटमा उल्लेख गरेको छ ।
अमेरिकी नागरिक बन्ने निर्णय गर्नु आप्रवासीको जीवनको एउटा महत्त्वपूर्ण कोसेढुङ्गा हो । नागरिकताका लागि उम्मेदवारहरुले हामीलाई अमेरिकीहरुको रुपमा बाँध्ने एकीकृत सिद्धान्तहरुप्रति प्रतिबद्ध छन् भनेर देखाउनुपर्छ । त्यो प्रतिबद्धताको बदलामा उनीहरुले अमेरिकी नागरिकताका आधारभूत अधिकार र विशेषाधिकारहरुको उपभोग गर्नेछन् ।
धेरैजसो ती आप्रवासीहरु टेक्सस, फ्लोरिडा, न्यूयोर्क, क्यालिफोर्निया, न्यूजर्सी, इल्लोनोइस्, भर्जिनिया, जर्जिया, म्यासाच्युसेट्स, वासिङ्टन, पन्सिलभेनिया, मेरिल्याण्ड, न्यूमेक्सिको, नर्थ क्यारोलिना, मा बसोबास गर्दै आइरहेका थिए । युएससीआईएसका अनुसार आप्रवासीले अमेरिकी नागरिक बन्न मुख्य पाँच प्रक्रिया अनिवार्य पुरा गर्नुपर्ने हुन्छ । ग्रीनकार्ड लिएको चार वर्ष पुरा भएको हुनुपर्ने, अनलाइन वा भौतिक रुपमा आवेदन दिनुपर्ने, बायोमेट्रिक्स स्क्रिनिङ, अन्तर्वार्ता पास गर्नुपर्ने, नागरिक शास्त्र र अंग्रेजी परीक्षा दिनुपर्ने र नागरिकता पाएपछि शपथ लिनुपर्ने प्रावधान छ ।
आप्रवासीलाई अमेरिकी नागरिक बन्न र बसोबास कडाइका लागि राष्ट्रपति डोनाल्ड ट्रम्प नयाँ कानुनहरु अघि बढाइरहेका छन् । उनले कागजातविहीन आप्रवासीलाई फर्काउने र कानुनी रुपमा बसोबास गरिरहेकालाई पनि ग्रिन कार्ड प्रदान गर्न नयाँ प्रावधानहरु ल्याउने प्रक्रिया अघि बढाएका छन् ।
