— एसियाली विकास बैंक (एडीबी) का ११ औं अध्यक्षका मासातो कान्दाले सोमबारबाट औपचारिक रूपमा पदभार ग्रहण गरेका छन् ।
कान्दाले मासात्सुगु आसाकावापछि अध्यक्षका रूपमा पदभार सम्हालेका हुन् । उनले अन्तर्राष्ट्रिय वित्त र विकास नीतिमा झन्डै चार दशक लामो अनुभव बटुलेका छन् । उनले जापानको अन्तर्राष्ट्रिय मामिलासम्बन्धी वित्त उपमन्त्रीका रूपमा पनि काम गरेका थिए । त्यस क्रममा बजारलाई स्थिरता दिने गरी इन्नोभेटिभ फाइनान्सियल सोलुसन र नीतिगत कदम चाल्न उनले महत्त्वपूर्ण भूमिका निर्वाह गरेको एडीबीले जनाएको छ ।
पदभार ग्रहणपछि कान्दाले एडीबी अध्यक्षको भूमिकामा आउन पाउँदा गर्व महसुस गरिरहेको बताएका छन् । 'हाम्रो क्षेत्रका लागि यो एक महत्वपूर्ण समय हो, ६९ सदस्य राष्ट्रहरूको विश्वास र समर्पित कर्मचारीहरूको समर्थनले मलाई एडीबीको दिगो, समावेशी र उत्थानशील विकासलाई प्रवर्द्धन गर्ने दायित्व पूरा गर्ने प्रेरणा मिलेको छ,' उनले भनेका छन्, 'विकासका चुनौतीलाई आपसी सहयोगमार्फत सामना गर्दै एडीबीलाई उत्कृष्ट क्षेत्रीय साझेदारका रूपमा कायम राख्नेछौं ।'
कान्दाले एडीबीको संस्थागत विशेषज्ञतालाई प्रयोग गरी साझेदारसँग मिलेर सबैभन्दा धेरै आवश्यकतामा रहेका समुदायका लागि रूपान्तरणकारी परिवर्तन गर्ने प्रतिबद्धता जनाएका छन् ।
'हाम्रो सहयोगले एसिया तथा प्रशान्त क्षेत्रका मानिसहरूको जीवनमा स्थायी सुधार ल्याउने सुनिश्चिततासहित वास्तविक परिणाम प्राप्त गर्ने व्यवहारिक कदमहरूमा केन्द्रित हुनेछ,' उनले भने ।
सन् १९६६ मा स्थापना भएको एडीबीमा ६९ सदस्य राष्ट्र रहेका छन् । यसमा ४९ एसिया तथा प्रशान्त क्षेत्रका छन् ।
