— बायर्न म्युनिखले अन्तिम क्षणको गोल मदतमा सेल्टिकलाई हराउँदै मंगलबार युरोपेली च्याम्पियन्स लिग फुटबलको अन्तिम १६ मा स्थान बनाएको छ । फेयनुर्डसँग पराजित भएपछि सातपल्टको च्याम्पियन एसी मिलान भने प्रतियोगिताबाट बाहिरिएको छ । अन्तिम १६ मा पुग्न सफल अन्य टिममा क्लब ब्रुग र बेन्फिका रहेको छ ।
एलिनाज एरिनामा भएको खेलमा अल्फान्सो डाभिसले दोस्रो हाफको इन्ज्युरी समयमा गोल गरेपछि दोस्रो लेगको खेल १–१ को बराबरीमा टुंगिएको थियो । यससँगै बायर्न समग्रमा ३–२ ले अगाडि रहन सफल रह्यो । यसअघि सेल्टिकले निकोलस केहनको गोलमा अगाडि रहेको थियो । पहिलो लेगमा बायर्न २–१ ले अगाडि रहेको थियो ।
आफ्नो घरेलु मैदानमा बायर्नले सजिलो जित निकाल्ने विश्वास थियो । तर त्यस्तो भएन र टिमले संघर्ष गर्नुपर्यो । ‘हामी नै यो जितका लागि हकदार हौं, किनभने हामी नै बलियो टिम रह्यौं,’ बायर्न प्रशिक्षक भिन्सेन्ट कोम्पनीले फरक मत प्रस्तुत गर्दै भनेका छन्, ‘खेलमा नियन्त्रण राम्रो रह्यो । त्यो भन्दा पनि महत्त्वपूर्ण फुटबलमा जित नै हुने गर्छ ।’
हारका बावजुत स्कटिस च्याम्पियन सेल्टिकका लागि यो प्रदर्शन गर्विलो रहनेछ । टोली उच्च शिर बनाएर घर फर्किन सफल रहनेछ । ‘खेलको गोल खानु जत्तिको नमज्जा अरू हुन्न । हामीलाई लागेको थियो, गोल नै हुन्न । त्यसैले यो निराशाजनक नै रह्यो । तर, हाम्रा खेलाडीको प्रदर्शनमा मलाई गर्व छ र तिनीहरूले सक्दो राम्रो खेले ।’
सान सिएरोमा भएको खेलमा डच क्लबसँग १–१ को बराबरीमा रोकिएपछि मिलानको चुनौती समाप्त भएको हो । फेयनुर्ड समग्रमा २–१ ले अगाडि रह्यो । १० खेलाडीमा सीमित रहेर पनि यो सफलता आत्मसात् गर्न सफल रह्यो । मिलानले सान्टियागो जिमिनेजको गोलमा पहिलो मिनेटमै अग्रता लिएको थियो । यो अग्रता खेलको ७३ औं मिनेटमा जुलियन कारानाजाले गोल गर्दै निस्तेज पारे । खेलपछि कारानाजाले भने, ‘सुरुमा मेरो प्रदर्शन राम्रो भएन, मलाई शारीरिक रूपमा गाह्रो भइरहेको थियो । मलाई दौडिन पनि गाह्रो भइरहेको थियो । तर मैले आफ्नो खेलजीवनकै सबैभन्दा महत्त्वको गोल यही खेलमा गर्न सकें, त्यसैले हामी खुसी छौं ।’
लिस्वनमा बेन्फिकाले मोनाकासँग ३–३ को बराबरी खेल्यो र समग्रमा ४–३ को अग्रता लिन सफल रह्यो । क्लब ब्रुगले भने एटलान्टालाई उसकै घरमा ३–१ ले हरायो र ५–२ को सजिलो अग्रता लियो । त्यसमा किशोर खेलाडी चेम्सडिन ताइबीले दुई गोल गरे । ‘हाम्रो प्रदर्शन उच्चस्तरको रह्यो । हाम्रा खेलाडीको आत्मविश्वासले यो सफलता मिलेको हो,’ ब्रुगका प्रशिक्षक निकी हायेनले भने ।
