। विवादित भारतीय युट्युबर तथा पडकास्टर रणवीर अलाहबादिया ‘बियरबाइसेप्स’लाई पक्राउ नगर्न त्यहाँको सर्वोच्च अदालतले अन्तरिम आदेश दिएको छ । ‘इण्डियाज गट लेटेन्ट’ नामक युट्युब शोमा अभद्र र अश्लिल टिप्पणी गरेको भन्दै उनीविरुद्ध महाराष्ट्र, असम र राजस्थानमा एफआईआर दर्ता भएका थिए ।
न्यायाधीश सूर्यकान्त र एन कोटेश्वर सिंहको इजलासले विभिन्न आदेश दिएको भारतीय संचारमाध्यमले जनाएका छन् । गतसाता बियरबाइसेप्सले सुरक्षा माग्दै अदालतमा निवेदन दिएका थिए । आदेशमा केही राहतका सर्त भएपनि कतिपय मामिलामा निर्देशन पनि दिइएको छ ।
अदालतले भनेको छ, ‘अलाहबादियाको दिमागमा पक्कै पनि केही फोहोर कुरा थियो, जसलाई उनले युट्युब शोमा बाहिर निकाले ।’ उनले प्रयोग गरेको शब्दले दिदीबहिनी-छोरी, आमाबुवा र समाजलाई पनि लाजमर्दो हुने पनि अदालतले भनेको छ । अदालतले प्रश्न गरेको छ, ‘समाजको मूल्य मान्यता के हो ? यी प्यारामिटरहरू के हुन्, के तपाईंलाई थाहा छ ? अभिव्यक्ति स्वतन्त्रताको नाममा समाजको मर्यादाविपरीत केही पनि बोल्न पाइँदैन ।’
अदालतले के निर्देशन दियो ?
रणवीरले आफ्नो पासपोर्ट प्रहरी चौकीमा बुझाउनुपर्नेछ, उनी अनुमतिबिना भारत बाहिर जान पाउने छैनन् ।
रणवीरले आफूविरुद्ध परेका उजुरीहरूमा प्रहरी र अनुसन्धान एजेन्सीहरूलाई सहयोग गर्नुपर्नेछ ।
मुद्दाको अन्त्य नभएसम्म रणवीर इलाहाबादियाको शोको कुनै पनि एपिसोड अन-एयर हुने छैन ।
रणवीरलाई के कुरामा राहत मिल्यो ?
मुम्बई र गुवाहाटीमा दर्ता भएका एफआईआरहरूमा दण्डात्मक कार्वाहीबाट उनलाई सुरक्षा प्रदान गरिएको छ ।
आपत्तिजनक टिप्पणीको मामिलामा रणवीर इलाहाबादियाविरुद्ध कुनै नयाँ एफआईआर हुनेछैन ।
यदि नयाँ एफआईआर दर्ता भयो भने रणवीरलाई पक्राउ गरिने छैन ।
