: नेपाली विद्यार्थीलाई दुर्व्यवहार गर्ने भारतको ओडिसा राज्यस्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयले माफी मागेको छ।
मंगलबार क्षमा याचना पत्र जारी गर्दै विश्वविद्यालयले माफी मागेको हो।
विश्वविद्यालयका उपकुलपति प्रा. सरनजीत सिंहले १६ फेब्रुअरी २०२५ को साँझ क्याम्पसमा भएको अप्रिय घटनाबाट आफूहरु अत्यन्तै दुखी भएका जनाएका छन्।
उनले क्याम्पससँग सम्बन्धित केही व्यक्तिले आन्दोलनकारी विद्यार्थीहरूसँग गरेको व्यवहारप्रति पनि विश्वविद्यालय परिवार दुःखी भएको बताए।
उनले भने, 'हामी हाम्रा विद्यार्थीहरूलाई माया गर्छौं र उनीहरूलाई कहिल्यै कुनै अपमान गरेका छैनौं। हाम्रा दुई अधिकारीहरूले गरेका टिप्पणीहरू अत्यन्तै गैरजिम्मेवारपूर्ण छन्। यद्यपि टिप्पणीहरू उनीहरूको व्यक्तिगत क्षमतामा क्षणिक प्रेरणामा गरिएका हुन्। हामी उनीहरूको कार्यलाई समर्थन गर्दैनौं।'
सजायस्वरुप ती कर्मचारीलाई सेवाबाट हटाइएको उनले बताए। घटनाप्रति माफी माग्दै उनले भने, 'उनीहरूले पनि आफ्नो व्यवहारको लागि माफी मागेका छन्। हामी पनि जे भयो त्यसको लागि माफी चाहन्छौं र यसैद्वारा सबै विद्यार्थी र नेपालका जनताप्रति हाम्रो माया र स्नेह प्रकट गर्दछौं। हामी उनीहरूलाई त्यति नै माया गर्छौं जति हामी भारतका जनता र विश्वका जनतालाई माया गर्छौं।'
उनले नेपाली विद्यार्थीलाई नियमित शैक्षिक कार्यक्रममा सामेल हुन अपील गरेका छन्।
विटेक तेस्रो वर्षमा अध्ययनरत बुटवलकी छात्रा प्रकृति लम्सालको शंकास्पद ‘मृत्यु’ लाई विश्वविद्यालयले आत्महत्या भनेको थियो। तर, विद्यालय प्रशासनको भनाइप्रति विद्यार्थीहरू आक्रोशित बन्दै उक्त घटनाको छानबिनको माग गर्दै प्रदर्शन गरेका थिए। त्यस लगत्तै ठूला संख्यामा नेपाली विद्यार्थीलाई विश्वविद्यालयबाट निकालिएको थियो। विश्वविद्यालयकै कर्मचारी दूर्व्यवहार गरेको भिडियोमा पनि स्पष्ट देखिन्छ।
सोही विश्वविद्यालयमा अध्ययरत भारतीय विद्यार्थीको दुर्व्यवहारका कारण छात्रा लम्सालको मृत्यु भएको नेपाली विद्यार्थीहरूको आरोप थियो। नेपाली विद्यार्थीको प्रदर्शनप्रति विश्वविद्यालय प्रशासन उल्टै आक्रोशित बनेको थियो। ठूला संख्यामा नेपाली विद्यार्थीलाई रातारात विश्वविद्यालयबाट निकालियो। रेल स्टेसनमा लगेर अलपत्र पारियो। दुर्व्यवहार गरी सयौं विद्यार्थीलाई घर फिर्ता जान प्रशासनले जबर्जस्ती गरेको विद्यार्थीहरूको गुनासो छ। सो विश्वविद्यालयमा करिब १२ सयको हाराहारीमा नेपाली विद्यार्थी अध्ययनरत रहेको अनुमान छ। अलपत्र परेका विद्यार्थीले दिल्लीस्थित नेपाली राजदूतावासमा फोन गरेर पीडा सुनाएका थिए।
