— प्यालेस्टिनी समूह हमासले शनिबर थप तीनजना इजरायली बन्धक मुक्त गरेको छ । हमासले १५ महिनादेखि बन्धक बनाएका अलेक्जेन्डर ट्रुफनोभ, याएर होर्न र सागी डेकल-खेनलाई रिहा गरेको हो । हमास र इजरायलबीच १९ जनवरीमा युद्धविराम लागू भएयता छैटौंपटक बन्धक रिहा गरिएको हो ।
शनिबार रिहा भएका तीनै जनालाई हमासले गाजाको दक्षिणमा पर्ने खान युनिस सहरमा अन्तर्राष्ट्रिय रेडक्रसका प्रतिनिधिसमक्ष हस्तान्तरण गरिएको हो । उक्त स्थानमा तयार पारिएको मञ्च वरपर शनिबार बिहानैदेखि हमास र अन्य प्यालेस्टिनी समूहका लडाकुहरू भेला भएका थिए ।
गाजामा भइरहेको बन्धकको रिहाइ प्रक्रिया इजरायलीहरूले तेल अभिभस्थित होस्टेज स्क्वायरमा उपस्थित भएर हेरेका थिए । बन्धकहरू रेडक्रसलाई हस्तान्तरण गरिएसँगै उनीहरू खुसीले चिच्याएका थिए । बीबीसीका अनुसार शनिवार रिहा भएका तीनै जनासँग दोहोरो नागरिकता छ ।
मुक्त भएर इजरेल फर्किसकेका उनीहरू सबै अन्य देशको नागरिकता समेत भएका इजरेली हुन् । २९ वर्षीय अलेक्जेन्डर ट्रुफनोभसँग रुस, याएर होर्नसँग अर्जेन्टिनाको र सागी डेकल-खेनसँग अमेरिकी नागरिकता छ । उनीहरू तीनै जनालाई ७ अक्टुबर २०२३ मा हमासले गरेको आक्रमणका बेला बन्धक बनाएर गाजा पुर्याइएको थियो ।
हमासले तीनजना बन्धक रिहा भएपछि इजरायलले पनि ३ सय ६९ जना प्लालेस्टिनी बन्दीहरू रिहा गर्दैछ । युद्धविराम सम्झौताअनुसार हमासले यसअघि १९ जना इजरायली र ५ जना थाई बन्धकहरू मुक्त गरेको थियो । रेडक्रसका अनुसार यसअघि इजरायलले ७ सय ६६ जना प्यालेस्टिनी बन्धक रिहा गरेको थियो ।
इजरायली अधिकारीहरूका अनसार रिहा भएकामध्ये केही इजरायविरुद्धका घातक आक्रममा दोषी ठहर भएकाहरू छन् । तर धेरैजसो युद्धका बेला पक्राउ परेका र अभियोजनबिना नै जेलमा राखिएकाहरू छन् ।
