: नेपाल ओलम्पिक कमिटी (एनओसी)को साधारणसभा, विधान संशोधन र निर्वाचनका विषयमा उठेको विवाद र त्यसको निराकरणका लागि ओलम्पिक काउन्सिल अफ एसिया (ओसीए)ले पहल थाल्ने भएको छ।
शुक्रबार अन्तर्राष्ट्रिय ओलम्पिक कमिटी (आईओसी) का निर्देशक जेम्स म्याकलियोडले एनओसी अध्यक्ष जीवनराम श्रेष्ठ र कमिटीमा आवद्ध संघहरुलाई पत्र लेख्दै पछिल्लो समय देखिएको विवाद समाधानको पहल ओसीएले गर्ने जानकारी गराएको हो।
चीनको हार्बिनमा आयोजना भएको एसियन विन्टर गेम्सका अवसरमा ओसीएले नेपाल ओलम्पिक कमिटीमा पछिल्लो समय देखिएको विवादका विषयमा बैठक आयोजना गरेको थियो। आईओसी र ओसीएका प्रतिनिधिको प्रत्यक्ष सहभागितामा भएको बैठकले नेपाल ओलम्पिक कमिटीमा देखिएको विवादका विषयमा छलफल गर्दै त्यसको जिम्मेवारी ओसीएलाई दिएको हो।
‘एनओसीको विवादका विषयमा ओसीएले सरोकारवाला सबै पक्षसँग सम्पर्क गर्नेछ र त्यसको जानकारी आईओसीलाई गराउने छ’, आईओसीको पत्रमा उल्लेख गरिएको छ।
आईओसी र ओसीएले गत माघ २३ मा पत्राचार गर्दै सधारणसभा र निर्वाचनको विवाद अदालतमा पुगेको र त्यसको अन्तिम निर्णयको नहुञ्जेलसम्म ‘पर्ख र हेर’को अवस्थामा रहेको जनाएको थियो। एनओसीको साधारणसभा र निर्वाचनका विषयमा पछिल्लो समय विभन्न प्रश्नहरु उठेको जनाउँदै त्यसबारे आफूहरू सचेत रहेको उल्लेख गरेको थियो।
एनओसीको विधान संशोधन गैरकानुनी रहेको भन्दै उच्च अदालत पाटनमा मुद्दा दायर गरिएको थियो। उच्च अदालतले पूर्व निर्धारित समयमा साधारणसभा नगर्न आदेश दिएको थियो। एनओसीले भने उच्च अदालतको आदेश समयमै नपाएको भन्दै साधारणसभा गरी विधान संशोधन गरेको थियो।
