। भारतीय युट्युबर तथा पडकास्टर रणवीर अलाहबादियाले आफूविरुद्ध दायर एफआईआर र अश्लिल टिप्पणीलाई चुनौती दिँदै त्यहाँको उच्च अदालतमा रिट दायर गरेका छन् ।
अलाहाबादियाका तर्फबाट अधिवक्ता अभिनव चन्द्रचुडले अदालतमा बहस गर्नेछन् । रिटलाई केही दिनमा दर्ता गर्ने जनाइएको छ । प्रधानन्यायाधीश सञ्जीव खन्ना र न्यायाधीश सञ्जय कुमारको इजलासले यो मुद्दामा सुनुवाइ गर्नेछ ।
वकिल चन्द्रचुडले चाँडै बहसको माग गरेका थिए किनभने असम प्रहरीले शुक्रबार उपस्थित हुन भन्दै पत्र काटेको थियो । यो पुरै मामिला युट्युब शो ‘इण्डियाज गट् लेटेन्ट’सँग जोडिएको छ ।
यसैबीच, स्ट्यान्ड-अप कमेडियन समय रैनालाई बिहीबार मुम्बई पुलिसपछि, असम प्रहरीले पनि उपस्थित हुन पत्र पठाएको छ । असम अपराध शाखाका दुई अधिकारी पुणेको बालेवाडीस्थित समय रैनाको घर पुगेका थिए ।
उनीहरूले आफूहरू रैनाविरुद्ध दर्ता भएको एफआइआरबारे कानुनी सूचना दिन गुवाहाटी आएको बताए । यसअघि असम प्रहरीले रणवीर अलाहाबादिया र आशिष चंचलानीलाई पनि नोटिस पठाएको थियो ।
असमका मुख्यमन्त्री हिम्मत विश्व शर्माले पनि आफ्नो राज्यमा एफआईआर दर्ता भएको बताएका छन् । विहीबार महाराष्ट्र साइबर सेलले युट्युबर रैनालाई दोस्रो पटक उपस्थित हुन भन्दै पत्र पठाएको थियो । साइबर सेलले समयलाई फागुन १७ गते सोमबार अनुसन्धान अधिकृत समक्ष हाजिर हुन भनेको छ ।
रैनाका वकिलले बुधबार रैना अहिले अमेरिकामा रहेको र मार्च १७ मा फर्किने बताएका थिए । बुधबार नै रैनाले आफ्नो शो ‘इन्डियाज गट् लेटेन्ट’लाई लिएर चलिरहेको विवादमा स्पष्टीकरण दिएका थिए । उनले इन्स्टाग्राममा आफ्नो शोका सबै भिडियो युट्युबबाट हटाएको दाबी गरेका थिए । उनले आफ्नो उद्देश्य जनतालाई हँसाउने मात्र रहेको बताए ।
