— इजरायली प्रधानमन्त्री बेन्जामिन नेतान्याहुले हमासले शनिबार दिउँसोसम्म इजरायली बन्धकलाई रिहा नगरे युद्धविराम भंग हुने चेतावनी दिएका छन् ।
इजरायली प्रधानमन्त्री नेतान्याहुले अमेरिकी राष्ट्रपति डोनाल्ड ट्रम्पको भनाइको स्वागत गर्दै हमासले बन्धक रिहा नगरे युद्धविराम अन्त्य हुने र इजरायली फौजले हमास पराजित नभएसम्म कडा लडाइँ सुरू गर्ने बताएका बीबीसीले जनाएको छ ।
'यदि हमासले शनिबार दिउँसोसम्म हाम्रा बन्धकहरूलाई रिहा गरेन भने युद्धविराम समाप्त हुन्छ र इजरायल रक्षा बल (आइडीएफ) ले कारबाही सुरू गर्नेछ,' नेतान्याहुले भने । यसअघि राष्ट्रपति ट्रम्पले शनिबार दिउसो १२ बजेसम्म हमासले सबै बन्धक रिहा नगरे युद्धविराम अन्त्यको घोषणा गर्ने चेतावनी दिएका थिए ।
हमासले सम्झौता उल्लंघन गर्ने र हाम्रा बन्धकलाई रिहा नगर्ने निर्णय गरेसँगै गाजापट्टी र वरपरका क्षेत्रमा आइडीएफ परिचालनका लागि निर्देशन दिएको उनको भनाइ छ । 'यो कार्य अहिले भइरहेको छ र छिट्टै सम्पन्न हुनेछ,' नेतान्याहुले भनेका छन् ।
