। इंग्लिस प्रिमियर लिग फुटबलमा मर्सीसाइडका दुई क्लब लिभरपुल र एभर्टनले रोमाञ्चक बराबरी खेलेका छन् । गएराति भएको खेल २-२ को बराबरीमा सकिएको हो ।
इन्जुरी समयको आठौं मिनेटमा गोल गर्दै एभर्टनले लिभरपुललाई बराबरीमा रोकेको हो । खेल सकिने क्रममा दुवै टोलीका खेलाडीले रातो कार्ड समेत पाएका थिए ।
लिभरपुलका लागि एलेक्सिस म्याक एलिस्टर र मोहमद सालाहले गोल गरे भने एभर्टनका बेटो र जेम्स तारकोस्कीले गोल गरे । इन्जुरी समयको १२औं मिनेटमा एभर्टनका अब्दुलाए डोकोरे र लिभरपुलका कर्टिस जोन्सले रातो कार्ड पाएका थिए ।
खेलको ११औं मिनेटमा बेटोले गोल गर्दै एभर्टनलाई अग्रता दिलाएका थिए । त्यसको ५ मिनेटपछि म्याक एलिस्टरले गोल गर्दै खेल बराबरीमा ल्याए । पहिलो हाफ १-१ को बराबरीमा सकिएको थियो ।
दोस्रो हाफको ७३औं मिनेटमा सालाहले गोल गर्दै लिभरपुललाई खेलमा अगाडि ल्याए । तर लामो समय चलेको इन्जुरी समयको आठौं मिनेटमा तारकोस्कीले गोल गरेपछि लिग लिडर लिभरपुल अंक बाँड्न बाध्य भयो ।
बराबरीपछि लिभरपुलको २४ खेलबाट ५७ अंक भएको छ । दोस्रो स्थानको आर्सनलभन्दा लिभरपुल अझै पनि ७ अंकले अघि छ । एभर्टन २७ अंकसहित १५औं स्थानमा छ ।
