— विभागीय टोली नेपाल पुलिस क्लब ११ औं पटक आहा–रारा पोखरा गोल्डकप फुटबलको फाइनलमा पुगेको छ । पोखरा रंगशालामा बुधबार ‘ए’ डिभिजन लिग विजेता चर्च ब्वाइज युनाइटेडलाई १–० ले हराउँदै पुलिस २४ औं संस्करणको फाइनल पुग्यो ।
प्रतियोगिताकै २ सय ५० औं खेलमा सञ्जीव लामाले निर्णायक गोल गर्दा छपल्टको च्याम्पियन पुलिसले उत्सव मनायो । उनले ५८ औं मिनेटमा गोल गर्दै लिएको अग्रता पुलिसले अन्तिमसम्म कायम राख्यो ।
चर्च ब्वाइजका राज भुसालले क्लियर गरेको बल नियन्त्रणमा लिँदै सन्जिवले २५ यार्डबाट गरेको भली प्रहारलाई गोलरक्षक टिकेन्द्रसिंह थापाले बचाउन सकेनन् । त्यही उत्कृष्ट गोल नै निर्णायक बन्दा पुलिस उपाधि यात्रामा अगाडि बढेको हो । सन्जिव प्लेयर अफ द म्याच चुनिए ।
खेलको पहिलो हाफमा दुवै टोलीले गोल अवसर बनाउन सकेनन् । नवौं मिनेटमा चर्च ब्वाइजका नवीन लामाको फ्रिकिकमा रोहन कार्कीको हेडर आफ्नै खेलाडीसँग ठोक्किँदै बाहिरियो । खेलको २१ औं मिनेटमा पुलिसका उज्ज्वल राईको फ्रिकिक विपक्षीको पोस्टमा पुगे पनि गोलरक्षक टिकेन्द्रले बचाए ।
दोस्रो हाफमा १–० ले पछि परेको अवस्थामा इन्ज्युरी समयमा चर्च ब्वाइजले कर्नर पायो । गोलरक्षक टिकेन्द्र पनि अन्तिम प्रयास गर्न विपक्षीको पोस्टमा पुगे । रोहनको कर्नर उनले भेटे । बक्सबाट उनले गरेको प्रहार फ्रेममा पर्न नसक्दा बराबरी बनाउने अवसर गुम्यो ।
कीर्तिमानी ११ औं पटक फाइनल प्रवेश गर्दा पुलिसले उद्घाटन खेलमा आयोजक सहारा क्लब र क्वाटरफाइनलमा ब्रिगेड ब्वाइज क्लब यूकेलाई पराजित गर्दै सेमिफाइनल तय गरेको थियो । चर्च ब्वाइजले प्रि–क्वाटरमा एनआरटी र क्वाटरफाइनलमा साबिक विजेता त्रिभुवन आर्मीलाई हराएर सेमिफाइनल यात्रा तय गरेको थियो । गत वर्ष क्वाटरफाइनलमा चर्च ब्वाइजलाई १–० ले पुलिसलाई हराएको थियो । प्रतियोगिताको २२ औं संस्करणमा पनि चर्च ब्वाइजले प्रि–क्वाटरफाइनलमा पुलिसलाई २–१ ले पराजित गरेको थियो ।
प्रतियोगितामा यो पुलिसको ५० औं खेल थियो । हालसम्म मनाङ मर्स्याङ्दीले सर्वाधिक ५२ खेल खेलेको छ । यसपल्ट भने मनाङ सहभागी छैन । २०५८ मा क्याराभान गोल्डकप हुँदा उपाधि जितेको पुलिसले पछि त्यही प्रतियोगिता आहा गोल्डकपको नामबाट हुन थालेपछि ह्याट्रिकसहित छपल्ट उपाधि जितेको छ । पुलिसले २४ मध्ये ०६३ मा बाहेक सबै वर्ष प्रतियोगितामा भाग लिएको छ ।
बिहीबार उज्वेकिस्तानको ब्ल्याक बुल्स फुटबल क्लब र थ्रीस्टारबीच दोस्रो सेमिफाइनल हुनेछ । प्रतियोगितामा पुलिस र मनाङले ६–६ पल्ट र थ्रीस्टारले ५ पल्ट उपाधि जितेको छ । ब्ल्याक बुल्सले भारतको थन्डरबोल्ट नर्थ युनाइटेड सिक्किमलाई क्वाटरफाइनलमा पराजित गरेको थियो । थ्रीस्टारले मछिन्द्रलाई हराएर सेमिफाइनल यात्रा तय गरेको हो ।
