— गाजाको युद्धविराम लागू भएको तीन सातापछि इजरायली फौज गाजा गाजालाई दुई भागमा विभाजन गर्ने क्षेत्रको नेत्जारिम करिडोरबाट फिर्ता भएका भएका छन् । जनवरी १९ मा प्यालेस्टिनी समूह हमाससँग भएको युद्धविराम सम्झौताअनुसार इजरायली फौज गाजा क्षेत्रबाट फिर्ता हुन थालेको हो ।
सम्झौतायता २१ इजरायली र ५ सय ६६ प्यालेस्टिनी बन्धकहरू रिहा भइसकेका छन् । इजरालयी फौज फिर्ता भएसँगै आइतबार सयौं प्यालेस्टिनीहरू उत्तरी गाजामा फर्कन थालेका छन् । बीबीसीका अनुसार विभिन्न सामानले भरिएका तथा स्थानीय चढेका दर्जनौं गाडीहरू आइतबार उत्तरी गाजातर्फ लागेका हुन् ।
दुई पक्षबीच भएको युद्धविरामको पहिलो चरण ६ साताको रहने सम्झौतामा उल्लेख छ । यस अवधिमा ३३ बन्धक र १९ सय कैदीहरू रिहा हुने अपेक्षा गरिएको छ । ३३ मध्ये ८ जनाको मृत्यु भएको इजरायलले जनाएको छ । तर युद्धविराम सम्झौताअनुसार इजरायलले गाजामा मानवीय सहायता पठाउने कार्यमा सहयोग नपुर्याएको हमासको आरोप छ ।
युद्धविराम सम्झौतामा दोस्रो चरणका लागि पहिलो चरण सुरू भएको १६ दिनपछि वार्ता हुने उल्लेख भएपनि वार्ता सुरू हुन सकेको छैन । युद्धविरामको दोस्रो चरणमा बाँकी बन्धकहरू रिहा गरिने तथा गाजाबाट इजरायली फौज पूर्ण रूपमा फिर्ता हुने उल्लेख छ ।
हमासले सन् २०२३ को अक्टुबर ७ मा इजरायलमा गरेको आक्रमणमा १२ सय जनाको ज्यान गएको थियो । २ सय ५१ जनालाई हमासले बन्धक बनाएर लगेको थियो । त्यसलगत्तै हमास र इजरायलबीच युद्ध चर्किएको हो ।
गाजास्थित स्वास्थ्य मन्त्रालयका अनुसार अक्टोबर ७ यताको युद्धमा ४८ हजार १ सय ८९ प्यालेस्टिनीले ज्यान गुमाइसकेका छन् । तीमध्ये एक तिहाइभन्दा बढी बालबालिका छन् । प्यालेस्टिनी अधिकारीहरूका अनुसार मारिएका बालबालिकाको संख्या १८ हजारभन्दा बढी छ । इजरायली आक्रमणमा १ लाख १० हजार घाइते भएका छन् । इजरायलतर्फ १४ सयभन्दा बढीको ज्यान गएको छ ।
१५ महिना लामो युद्धपछि गाजामा दुई साताअघि युद्धविराम भएको थियो । युद्धका क्रममा लाखौं विस्थापित भएका छन् भने ६० प्रतिशतभन्दा बढी संरचना ध्वस्त भएका छन् । युद्धअघि गाजाका २२ लाख मानिसहरूको बसोबास रहेको थियो । तीमध्ये ७ लाख ७५ हजार उत्तरी गाजामा जना रफाह र खान युनिस, देइर अल-बालाह, र गाजा सहरमा बसोबास गर्दै आएका थिए । तर युद्धका क्रममा ती स्थानका ७ लाखभन्दा बढी विस्थापित भइसकेका छन् ।
