— प्यालेस्टिनी समूह हमासले शनिबार गाजा स्ट्रीपबाट थप तीन जना इजरायली बन्धक मुक्त गरेको छ । युद्धविराम लागु भएपछिको पाँचौं पटकमा तीन जनालाई रिहा गरिएको हो ।
शनिबार मुक्त भएका ५२ वर्षीय एली शराबी, ५६ वर्षीय ओहाद बेन अमी र ३४ वर्षीय अर लेभी तीनै जना सर्वसाधारण हुन् । हमासले उनीहरूलाई सन् २०२३ को अक्टोबर ७ को आक्रमणपछि बन्धक बनाएर गाजा लगेको थियो ।
हमासले तीन जनालाई रिहा गरेसँगै इजरायलले पनि थप १८३ जना प्यालेस्टिनी बन्दीहरूलाई रिहा गरेको छ । शनिबार रिहा भएकामध्ये ७० जनाभन्दा धेरै आजीवन वा लामो समयको कैद सजायहरू काटिरहेकाहरू हुन् । इजरायल र हमासबीच जनवरी १९ मा युद्धविराम सम्झौता भएको थियो । समझौताअनुसार हमासले २१ बन्धक रिहा गरिसकेको छ । ३८३ जना प्यालेस्टिनी बन्दीहरू रिहा भइसकेका छन् ।
६ साता लामो युद्धविरामको पहिलो चरणमा हमासले ३३ जना इजरायली बन्धक रिहा गर्न सहमत भएको छ । त्यसको बदलामा करिब १९ सय प्यालेस्टिनी बन्दीहरू रिहा हुने जनाइएको छ । ३३ जनामध्ये केहीको मृत्यु भइसकेको जनाइएको छ ।
युद्धविराम सम्झौतामा दोस्रो चरणका लागि पहिलो चरण सुरू भएको १६ दिनपछि वार्ता हुने भनिएको थियो । त्यसअनुसार गत सोमवार नै वार्ता सुरू हुनुपर्नेमा त्यसबारे कुनै जानकारी दिइएको छैन । युद्धविरामको दोस्रो चरणमा बाँकी बन्धकहरू रिहा गरिने तथा गाजाबाट इजरायली फौज पूर्ण रूपमा फिर्ता हुने बताएको छ ।
तर युद्धविराम सम्झौताअनुसार इजरायलले गाजामा मानवीय सहायता पठाउने कार्यमा सहयोग नपुर्याएको हमासले आरोप लगाएको छ । हमासको प्रेस कार्यालयले युद्धविरामयता गाजामा १२ हजार सहायता सामग्री बोकेका ट्रक पुग्नुपर्नेमा ८५ सयवटा मात्र पुगेको जनाएको छ । तर राष्ट्रसंघले भने युद्धविरामयता गाजामा १० त्यस्ता गाडी पुगिसकेका जनाएको छ ।
तेस्रो र अन्तिम चरणमा गाजाको पुनर्निर्माण अघि बढाइने र त्यसका लागि लामो समय लाग्न सक्ने बताइएको छ । यो चरणमा बाँकी बन्धकका शवहरू फिर्ता गरिने युद्धविराम सम्झौतामा उल्लेख छ । तर अमेरिकी राष्ट्रपति डोनाल्ड ट्रम्पले गाजा क्षेत्र नियन्त्रणमा लिने र त्यहाँको पुननिर्माणका लागि प्यालेस्टिनीहरूलाई अन्य देशमा पुनर्स्थापित गर्ने बताएका छन् । जसका कारण गाजा क्षेत्र र प्यालेस्टिनीको भविष्यबारे थप चिन्ता उत्पन्न गरिदिएको छ ।
