। पाकिस्तानको फुटबल फेरि फिफाको निलम्बनमा परेको छ । अन्तर्राष्ट्रिय फुटबलको सर्वोच्च निकाय (फिफा)ले तत्काल लागू हुने गरी पाकिस्तान फुटबल फेडेरेसन (पीएफएप) लाई निलम्बन गर्ने निर्णय गरेको हो ।
पीएफएको संशोधित विधान लागू गर्न असफल भएको कारणले गर्दा पीएफएफलाई तत्कालै लागू हुने गरी निलम्बन गर्ने निर्णय गरेको फिफाले जनाएको छ । पाकिस्तानको फुटबल सामान्य अवस्थामा नफर्केसम्म पीएफएफको निलम्बन कायम रहनेछ ।
फिफा र एएफसीले प्रस्तुत गरेको पीएफएफ विधानलाई पीएफएफको कंग्रेसले अनुमोदन गरेपछि मात्र निलम्बन हटाइने पनि फिफाले जनाएको छ ।
पाकिस्तान फुटबल निलम्बनमा परेको यो पहिलो पटक भने होइन । यसअघि फिफाले सन् २०२१ मा पनि पाकिस्तान फुटबल निलम्बन गरेको थियो । उक्त निलम्बन सन् २०२२ मा फुकुवा भएको थियो ।
निलम्बपछि पाकिस्तान फुटबलले अन्तर्राष्ट्रिय खेलहरुमा पुनरागमन गरेको थियो तर त्यहाँको फुटबल अझै पनि सामान्य रुपमा अघि बढ्न नसकेपछि फिफाले पाकिस्तान फुटबललाई फेरि निलम्बन गरेको हो ।
यो लम्बनपछि पाकिस्तानले आगामी मार्चदेखी हुने एएफसी एसियन कप छनोटको तेस्रो चरणको खेल खेल्ने/नखेल्ने अनिश्चित बनेको छ । उक्त छनोटमा पाकिस्तान रहेको समूह ई मा सिरिया, अफगानिस्तान र म्यानमार छन् ।
यस्तै फिफाले ‘थर्ड पार्टी’ को प्रभाव रहेको भन्दै अफ्रिकी राष्ट्र कंगो फुटबललाई पनि अर्को निर्णय नहुँदासम्मको लागि लिम्बन गरेको छ ।
पीएफएफ नर्मलाइजिङ कमिटीका अध्यक्ष हारुन मलिकले विश्व फुटबलको नियमनकारी निकाय फिफा र पाकिस्तान फुटबलको नवनिर्वाचित कंग्रेसबीच गतिरोध रहेको बताउँदै यसले गर्दा फिफाले पाकिस्तानलाई ‘शर्त’ सहित निलम्बन गर्न सक्ने बताए ।
‘फिफाले पीएफएफको विधानलाई अन्तर्राष्ट्रिय मापदण्ड अनुरूप बनाउन केही संशोधन गर्न चाहन्छ । तर नवनिर्वाचित पीएफएफ कंग्रेसका अधिकांश सदस्यहरूले फिफाको प्रस्तावहरूमा सहमति जनाएका छैनन्,’ मलिकले भनेका छन् ।
