। अभिनेत्री मनीषा कोइरालाले कमाइमा इतिहास रचेको नेपाली फिल्म ‘पूर्णबहादुरको सारङ्गी’ हेर्न चाहेर पनि नपाएको बताएकी छन् । ‘दुईपटक यो फिल्म हेर्ने समय मिलाएँ तर हाउसफूलको कारण टिकट पाइँन’ ह्वाइट हाउस साहित्य महोत्सवमा उनले भनिन् ।
नेपाली फिल्म यसरी चलेकोप्रति आश्चर्य मान्दै उनले नेपाली फिल्मको बजार विस्तार हुँदै गएको बताइन् । फेस्टिभल अन्तर्गतको छलफल सत्र ‘आर्ट बियोन्ड बाउन्ड्रिज’मा उनी बोल्दै थिइन् ।
सो अवसरमा उनले भनिन्, ‘नेपाली फिल्म अन्तराष्ट्रिय बजारमा पुगिसक्यो । नेपालमा फिल्मको बजार ठूलो बनेको एउटा उदाहरण पूर्णबहादुरको सारङ्गी हो ।’
मनीषाले बलिउड कलाकारको कडा मिहेनतले स्थापित हुन पुगेको बताइन् । उनले भनिन्, ‘बलिउडका कलाकारले जस्तै मिहेनत यहाँ भएको छ । यही मिहेनतले निरन्तरता पायो भने नेपाली फिल्मको बजार फराकिलो हुनेछ ।’
सफलता पाउन निरन्तरता र कडा मेहनत जरुरी रहेको उनले बताइन् । कला यात्रामा लाग्नुको कारण पारिवारिक पृष्ठभूमि राजनीतिक मात्रै नभएर कलाप्रति परिवारको झुकाव पनि रहेको उनले बताइन् ।
आफ्नो पारिवारिक पृष्ठभूमि राजनीतिक भए पनि आफू सामान्यरुपले हुुर्किएको स्मरण उनले गरिन् । साहित्यिक कार्यक्रममा बोल्न मन लाग्नुको कारणबारे उनी सुनिइन्, ‘नयाँ पुस्ताका विद्यार्थीमाझ पुग्दा आफूमा अझै धेरै काम गर्ने ऊर्जा आउँछ । कथा सुन्ने र सुनाउने थलो भएकाले म यस्ता कार्यक्रममा पुग्छु ।’
कुराकानीको क्रममा उनले क्यान्सरलाई जित्न मनोबल बलियो हुनुपर्ने बताइन् । ‘क्यान्सरलाई जित्नका लागि मनोबल बलियो हुनु पर्छ’ उनले भनिन्, ‘आफैबाट बाँच्ने प्रयास गर्नुपर्छ ।’
