: पर्सामा जारी महिलाको पाठेघरको मुखको क्यान्सरविरुद्धको एचपीभी खोप अभियानमा खटिएका स्वास्थ्यकर्मीलाई गालीगलौज र हातपात गर्ने दुई जनालाई प्रहरीले नियन्त्रणमा लिएको छ।
पक्राउ पर्नेहरूमा पर्साको पोखरिया नगरपालिका-१ बनकटवाका ३५ वर्षीय प्रमोद पटेल र अर्का युवक मन्जय गिरी रहेका छन्। उनीहरूलाई इलाका प्रहरी कार्यालय पोखरियाको हिरासतमा राखिएको छ।
माघ २२ देखि पर्सामा पनि जारी एचपीभी खोप अभियान अन्तर्गत पोखरिया–१ बनकटवास्थित आधारभूत स्वास्थ्य केन्द्रमा स्थापना गरिएको खोप केन्द्रमा बिहीबार पुगेका पटेलले कक्षा ३ मा पढ्ने आफ्नी छोरीलाई उक्त खोप लगाउन दबाब दिएका थिए।
तर खोप केन्द्रका इन्चार्जसमेत रहेका अहेब शोशील कुमार महतोले अभियान अन्तर्गत कक्षा ६ देखि कक्षा १० सम्मका बालिका र किशोरीलाई मात्र एचपीभी खोप लगाइने भएकाले पटेलककी छोरी उक्त लक्षित उमेर समूहमा नपर्ने भन्दै खोप लगाउन अस्वीकार गरेका थिए। त्यही निहुँमा पटेल र गिरीले अहेब महतो र वडा कार्यालयका सचिवलाई गाली गलौज गर्दै हातपात गरेको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले बताए।
खोप केन्द्रमा खटिएका स्वास्थ्यकर्मी र वडा सचिवमाथि हातपात भएपछि प्रहरीलाई खबर गरिएको र प्रहरीले पटेल र गिरी दुवैलाई नियन्त्रणमा लिएर प्रहरी कार्यालयमा लगेको ठाकुरले जानकारी गराए।
स्वास्थ्यकर्मी र वडा सचिवमाथि हातपात गर्ने दुबै जनालाई नेपालको प्रचलित कानुन अनुसार कारबाही हुनुपर्ने आफूहरूको माग रहेको ठाकुरले बताए। हातपात गर्नेहरूलाई कारबाही नगरिए खोप अभियानमा खटिएका स्वास्थ्यकर्मीहरूको मनोबल खस्किने भन्दै उनले यसले खोप अभियानमै असर पनि पर्न सक्ने बताए। ठाकुरले भने,‘यदि दोषीहरूलाई कानुनअनुसार कारबाही भएन भने स्वास्थ्य कार्यालयले खोप अभियानमा असहयोग गर्ने व्यक्ति वा निकायविरुद्ध कारबाहीका लागि माथिल्लो निकायमा पत्राचार गर्छ।’
यता जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले भने आरोपित दुवै व्यक्तिलाई इलाका प्रहरी कार्यालय पोखरियाको हिरासतमा राखेर अनुसन्धान भइरहेको बताए। पीडित पक्षले लिखित जाहरी दिएपछि जाहेरीमा उल्लेख कसुर अनुसार नेपालको प्रचलित कानुन बमोजिमको मुद्दा दर्ता गरेर आवश्यक प्रक्रिया अगाडि बढाइने लम्सालले बताए।
