— नेदरल्यान्ड्सले त्रिकोणात्मक महिला ट्वान्टी-२० क्रिकेट शृंखलामा बिहीबार थाइल्यान्डलाई रोमाञ्चक खेलमा १ विकेटले पराजित गरेपछि उपाधिको निर्णय अन्तिम दिनको खेलमा पुगेको छ ।
नेदरल्यान्ड्सले १ सय १० रनको लक्ष्य अन्तिम बलमा पूरा गरेको थियो । टोलीले अन्तिम ओभरमा ८ रन बनाउदै स्मरणीय विजय हात पारेको थियो । सिल्भर सिगर्सले अन्तिम बलमा २ रन बनाउदै विजयी रन बटुलेकी थिइन् । यसअघि टस जितेर ब्याटिङ रोजेको थाइल्यान्डले त्रिवि क्रिकेट मैदानमा निर्धारित २० ओभर खेलि ५ विकेट गुमाई १ सय ९ रन बनाएको थियो ।
थाइल्यान्ड र नेदरल्यान्ड्स दुवैले समान ५ विजय हात पारेका छन् । नेदरल्यान्ड्सले सबै ६ खेल खेलिसकेको छ भने थाइल्यान्डले शुक्रबार अन्तिम दिनको खेलमा नेपालसँग खेल्दै छ । नेपाललाई पराजित गरेमा थाइल्यान्ड विजेता बन्ने छ । तर नेपालले विजय हात पारेमा नेदरल्यान्ड्स थाइल्यान्डबीचको खेल नेट रनरेटका आधारमा निर्णय हुनेछ ।
सहभागी टोलीले एक अर्कासँग ३–३ पटक खेलेपछि सर्वाधिक अंक बटुल्ने टोली विजेता बन्ने छ । शृंखलामा नेदरल्यान्ड्सले थाइल्यान्डलाई पहिलो पटक पराजित गरेको हो । नेदरल्यान्ड्सले यसअघिका ५ खेलमा ३ जित र हार बेहोरेको थियो । टोलीको तीनै जित नेपालसँग रहेको छ भने दुवै हार थाइल्यान्डसँग रहेको छ ।
फेब मोलकेनबोइरले ४२ बलमा २ चौकाको मद्दतमा ३२, रोबिन रिज्केले २१ बलमा १ चौका प्रहार गरि २० र स्टेर कालिसले १४ रन बनाई नेदरल्यान्ड्सलाई विजयी बनाए । थाइल्यान्डबाट थिपत्चा पुथावोङले ४ ओभरमा १२ रन खर्चेर ४ विकेट लिए पनि टोलीलाई विजयी बनाउन सकिनन् । ओनिचा कामचोम्फुले ४ ओभरमा १९ रन खर्चेर ३ र फनिता मायाले २ विकेट लिइन् ।
यसअघि पहिला ब्याटिङ गर्नेक्रममा अफिसरा सुवानचोनराथी शुन्य, नानापात कोन्चारोइन्काई ३ र नताया बुचाथन ६ रनमा आउट भएपछि थाइल्यान्डले पाँचौँ ओभरमा १० रन बनाउँदा ३ विकेट गुमाइसकेको थियो । त्यसपछि कप्तान नारुइमोल चाइवाईले १५ रन बनाइन् ।
नाथाकन चानथमले चानिदा सुथिरुएङसँग पाँचौं विकेटमा ६६ रनको महत्त्वपूर्ण साझेदारी गरे । सुथिरुएङले २८ बल खेली ४ चौकासहित ३२ रन बनाइन् । चानथम ४६ बल खेलि ४ चौका र १ छक्का प्रहार गरी ३६ र सुवानान खिएटोले ४ बलमा १ छक्का प्रहार गर्दै अविजित १० रन बनाए । नेदरल्यान्ड्सकी आइरिस विलिङले ४ ओभरमा ९ रनमात्र खर्चेर ३ र हिथर सिगर्सले ४ ओभरमा १ मेडन राख्दै १८ रन खर्चेर २ विकेट लिइन् ।
