— अमेरिकाले एच-वानबी (रोजगारमूलक अस्थायी गैरआप्रवासी) भिसामार्फत एकैपटक ८५ हजार कामदार ल्याउने भएको छ । लटरीका रूपमा खुलाइने एच-वानबीमार्फत विश्वभरबाट कामदार ल्याउँदै आएको अमेरिकाले २०२६ मा एकैपटक ८५ हजार कामदारलाई भिसा दिने योजना अघि बढाएको हो ।
यो भिसा प्राप्तका लागि जोसुकैले पनि अनलाइनमार्फत फारम भर्न पाउने छैनन । अमेरिकामा रहेको कुनै एक कम्पनीले रोजगारीका लागि अवसर दिएको अवस्थामा रोजगारदाता कम्पनी, उसको प्रतिनिधि वा कम्पनीको आधिकारिक कानुन व्यवसायीले मात्र अनलाइनमार्फत आवेदन दर्ता गर्नसक्ने युनाइटेड स्टेट्स सिटीजनसिप एन्ड इमिग्रेसन सर्भिसेज (यूएससीआईएस)ले आफ्नो वेबसाइटमा उल्लेख गरेको छ ।
स्नातक वा स्नोत्तकोत्तर उतीर्ण गरेकाहरूले भिसाका आवेदन दिन सक्ने र इन्जिनियर, डाक्टर, प्राविधिकहरू यो भिसाका लागि प्रारम्भिक योग्य हुने यूएससीआईएसले दाबी गरेको छ । २०२५ मार्च ७ देखि मार्च २४ सम्म आवेदन दिन सकिने समयसीमा र शुल्क २ सय १५ अमेरिकी डलर तोकिएको छ ।
अनलाइनमार्फत लिइने फारम दर्ता अवधि सकिएपछि आवेदन दिएकालाई लोटरीबाट चयन गरिने र अन्तर्वार्ताका लागि बोलाइने यूएससीआईएसले जनाएको छ । यो भिसाको अवधि सुरुमा ३ वर्ष र पछि ६ वर्षसम्म थप्न सकिने प्रावधान छ । यो भिसामार्फत विश्वका विभिन्न देशबाट विशेषगरी आईटी क्षेत्रका कामदारहरू अमेरिका आउने गरेका छन् । जसमध्ये भारतीयहरूको संख्या अधिक छ । यो भिसा सन् १९९० को अध्यागमन ऐनअन्तर्गत अघि बढाइएको हो । विशेषगरी नर्सहरूका लागि एच-वानए र अन्य रोजगारका लागि एच-वानबी छुट्याइएको थियो ।
